“Bozdauh, soujgih gou baenzlawz hwnjvangj mbouj ndaej ha?” Gou ngamq byaij haeuj ranz, daxbuz couh doiq gou hemq, sing hung gok dwk rwz gou yaek nuk lo. Gou dawz aen soujgih daeuj yawjyawj, youh buet bae yawj aen luyouzgi le, lwnh daxbuz aen siusik boihseiz he: Ndaw ranz mbouj miz saenqhauh Wi-Fi lo. Daxbuz dingq gou baenzneix gangj le gig saetmuengh.

Gwn haeuxcaeuz le, gou lij lumj bingzseiz nei hainduj sij cozyez, gou raen ndaw ranz caeuq bingzseiz mbouj ityiengh: Yienzlaiz daxboh gwn haeux le couh naengh youq gwnz sahfaz dwk youzheiq haenx, seizneix caeuq daihgya gangjgoj lo. Gangj daengz giz angq, de lij fwngz vad din dab, daeuq ndaej daxgoeng daxbuz riuhaha. Sawqmwh, sing gangj sing riu fwt dingz roengzdaeuj, aiq dwg daihgya raen sing daiq hung, lauheiq cauz gou sij cozyez ba. Daxmeh bingzseiz cungj yungh veihsin caeuq vunz gangjgoj haenx, naengh youq gwnz sahfaz yawj cazci lo. Gou lij dingq daxbuz naeuz, ndaw ranz mbouj miz Wi-Fi, naengh youq mbouj miz eiqsei, okbae byaijbyaij gonq. Daxgoeng ne, bingz- seiz hix dwg “bouxngaemgyaeuj”, baez ndaejhoengq couh gaem soujgih ngaemgyaeuj yawj. Mbatneix mbouj miz Wi-Fi lo, de mbwq lai lo. De youq ndaw ranz byaij bae byaij dauq, yaep he byaij haeuj rug bae, yaep he byaij haeuj ranzdajcawj bae, yaep he youh naengh youq gwnz sahfaz. Doeklaeng saedcaih mbwq lai lo, daxgoeng hainduj doiq byagim ndaw gang fatngawh. Gou nyaenx mbouj youq riuhaha naeuz:“Daxgoeng, mwngz daiq ndeiriu lo, mbouj couh dwg mbouj miz Wi-Fi ma, baenzlawz lumj hoenz mbouj raen nei ne.” Daxgoeng riumbw dwk naeuz:“Hai, mbouj miz Wi-Fi caen mbwq ha!”

Wi-Fi gaenq caeuq gij gwndaenj gyoengqvunz gvanhaeh maedcaed, daihgya lumjbaenz gaenq liz mbouj ndaej de lo. Mboujgvaq, gou raen ndaw ranz mbouj miz Wi-Fi cungj gamjsouh neix gig ndei!

(haj nienzgaep Cuh Bozdauh)