Seiziq, dwg sawj vunz nanzlumz. Moix baez dauqngeix hwnj seiziq, gou couh vih gou guh gvaq gij saehhuk haenx riuhaha, hag duzgoep couh dwg ndawde gienh saeh he.

Mwhde gou cij haj bi. Miz ngoenz he banringz, gwn ngaiz le, gou youq ndaw hongh guhcaemz. Sawqmwh, miz yiengh doxgaiq heuyauyau he daj baihnaj gou yat gvaq. Gou sijsaeq yawj, laxlawz dwg duz goep he. Yawjraen duzgoep maeuq youq gizhaenx, gou hix dawz song fwngz cuengq youq gwnz dieg maeuq roengzdaeuj; yawjraen aen’gyaeuj duzgoep ngiengx coh gwnz, gou hix ngiengx gyaeuj coh gwnz; yawjraen aennaj duzgoep baez bongq baez bongq, gou hix hawj aennaj gou baez bongq baez bongq; duzgoep gobgob hemq geij sing, gou hix gobgob hemq hwnjdaeuj. Fanjcingq, duzgoep baenzlawz guh gou couh baenzlawz guh. Seizhaenx, daxboh cingqngamj yawjraen gou, couh nyaenx mbouj ndaej riuhaha. Hoeng gou lij hozoiq ndeiriu dwk cam: “Daxboh, nanzdauh gou hag ndaej mbouj lumj ha?” Yawj gij yiengh gou gig nyinhcaen, daxboh riu naeuz: “Lwg huk ha, mwngz hag ndaej lumj raixcaix, saedcaih dwg duz goep hung he!” Dingq daxboh yienghneix gangj, gou youh daekeiq hag gij yiengh duzgoep hemq le geij sing. Aiq dwg sing gou daiq hung lo, hwk dwk duzgoep yat deuz lo. Daxboh gangjriu naeuz: “Mwngz yawj, duzgoep iq yawjraen mwngz duzgoep hung neix, cungj mbouj gamj okdaeuj lo.” Dingq gij vah daxboh, gou angq dwk riuhaha lo.

Seiziq caen mizyinx, seizneix dauq- ngeix hwnj gienh saeh neix, gou lij dwg nyaenx mbouj youq gag riu.

(seiq nienzgaep Giuz Sanghyingz)