Ngoenz he, gou youq gwnz dennauj yawjraen bien cozvwnz gig geizheih ndeu.

Baenzlawz geizheih ne? Gou couh caeuq sou gangjgangj ba! Youq ndaw sujgyaj, lauxsae naeuz yaek hawj dou moix vunz sij cib bien ngoenzgeiq, lij iugouz moix bien mbouj noix gvaq 300 cih. Gou roxnyinh daiq dwgrengz lo, cib bien ha, moix bien lij mbouj noix gvaq 300 cih, caen aeu mingh bw! Yienghneix gou couh bae caz dennauj.

Youq gwnz dennauj, ngamq diemjhai Bwzdu, diuz daezmoeg gig yinx vunz he youq baihnaj gou bi bae bi dauq, yi! “Cozvwnz geizheih”, gijmaz cozvwnz baenzneix geizheih ne? Gou gig geizheih diemjhai de.

Gou yawjraen bien cozvwnz mbouj daengz 60 cih saw he. Daezmoeg couh dwg《Cozvwnz Geizheih》. Ngoenzgeiq bouxsij dwg 2 nyied 30 hauh, dienheiq gvengq. Neiyungz daihgaiq dwg: Ngoenzneix dwg ngoenz mbouj miz ndit he, gou gig siengsim, aenvih daxboh cawx hawj gou song duz byagim, ciengx youq ndaw gangbya dumh dai duz ndeu lo……

“Bien cozvwnz neix mbouj geizheih ha.” Seizneix gou youh siengj daengz Bwzdu dwg mbouj yaeuh vunz, gou baenzlawz siengj cungj siengj mbouj doeng, cijndei bae heuh daxboh bang gou gej gij geizheih neix. “Daxboh, gwnz Bwzdu miz bien cozvwnz geizheih he, hoeng gou ra mbouj raen gij geizheih de youq gizlawz, mwngz vaiq daeuj bang gou yawjyawj, gou gig siengsim.” Daxboh ngeizngwd dwk naeuz: “Dwg gijmaz cozvwnz hawj daeglwg gou baenzneix doeknaiq ha? Daeuj, daxboh bang mwngz yawjyawj！”

Daxboh yawj sat cozvwnz, riu lo, gou gamjdaengz daxboh lumjbaenz rox gijmaz lo, couh cam: “Daxboh, mwngz vaiq naeuz gou nyi!” Gou gip raixcaix, daxboh vah naek cingz laeg naeuz: “Bien cozvwnz neix caen dwg geizheih ha, 2 nyied baenzlawz miz 30 ngoenz ne? 2 nyied ceiq lai miz 29 ngoenz, caiq gangj ngoenzhaenx mbouj miz ndit baenzlawz dwg ngoenz- gvengq ne? Lij miz, bya bonjlaiz couh gwnyouq youq ndaw raemx, baenzlawz deng raemx dumh dai ne?” Daxboh gangj sat, gou hix haha riu hwnjdaeuj lo.

Dwg ha, baezneix caz Bwzdu hawj gou roxdaengz le sij cozvwnz mbouj ndaej luenh bien, itdingh aeu hab saedsaeh, mboujnex couh hawj vunz riu lo!

(seiq nienzgaep Lij Vwnzgez)