Banhaemh, daengngoenz ndonj gvaq caengzfwj, caenhrengz dawz gij ronghndat doeklaeng saj youq gwnzmbwn baihsae. Seizde baihsae gwnzmbwn, lumjbaenz miz ciengz heiq gyaeundei he yaek biujyienj, daeng gyaeundei gwnz daizheiq doengzcaez hai rongh, geij duj fwj henz de deng nyumx baenz saek hoengzoiq.

Daengngoenz youq yaek doek roengz bya yaepyet haenx, lij mbouj lumz biujyienj gij cezmuz bienqnaj caixhangz de hawj daihgya yawj. De caenhrengz daj caengzfwj ndonj aen’gyaeuj de okdaeuj, yaep he dwg aennaj nding’yanyan, yaep he youh loh’ok aennaj henjmyagmyag. Daengngoenz mwh nding lumj aen giuzfeiz hung he, mwh henj lumj aen mbakdoengj hung he. Menhmenh, daengngoenz sou gij ronghmyag lwenqda de hwnj, lumj dahniq launyaenq he, aennaj ndingfwdfwd. Dujfwj henz de hix riengz dwk daz hwnj saeknding.

Gvaq yaep he, ndit bienq myox lo. Dujfwj henz daengngoenz bienqbaenz gak cungj saek, lumj boux canghdajveh mbouj siujsim saj gij saek dajveh de youq gwnzmbwn nei. Yaepyet, fwjhaemh bu ok buenq aen mbwn.

Yaep he, gwnzmbwn okyienh song duz lungz, lumj “song lungz daeuq caw” ndaw gojlwgnyez ityiengh, youq gwnzmbwn mbin hwnj mbin roengz, loengh aencaw hajsaek. Gyoengqde guhcaemz ndaej cingq angq, swnh gou yaepda mbat haenx siusaet lo. Gwnzmbwn yaep he youh lumj seiqgyaiq doenghduz, yaep he youh lumj bya’bya lueglueg……, aenda gou cungj yawj mbouj gvaqdaeuj.

Menhmenh dwk, daengngoenz deng gij fwj mongndaem doi daeuj haenx cw youq lo, gij rongh myox lo. Youq ndaw sing roeg haeuj rongz caeuq sing riu gyoengqvunz, fwjhaemh sou hwnj gij rongh doeklaeng de. Yawj fwjhaemh ciemhciemh siusaet haenx, gou gag siengj: Sengmingh fwjhaemh gig dinj, hoeng de aeu gij gingjsaek ceiq gyaeu de louz hawj le gyoengqvunz.

(roek nienzgaep Cah Vwnzvei)