Dangz suyoz hozdung, ban dou gawjhengz ciengz suyoz bueklwnh he. Bouxcujciz Cuh lauxsae ok diuz daez yienghneix hawj daihgya: Gyaz beij yez noix 20%, yienghneix yez beij gyaz lai bak faenh cih geij?

Yawj daezmoeg le, mbiengjlamz daibyauj Gauh Cibungz naeuz:“Ginggvaq daujlun, doih dou nyinhnaeuz gawqyienz gyaz beij yez noix 20%, yienghneix yez haengjdingh beij gyaz lai 20%……”

Mbiengjnding daibyauj Cauz Yijgoj caengz caj Gauh Cibungz gangj sat couh buek naeuz: “Doih dou nyinhnaeuz yez beij gyaz lai 25%.”

Mbiengjlamz daibyauj Gauj Cibungz riu naeuz:“Gvanhdenj mbiengj dou cij deng. Daihgya cungj rox, gyaz beij yez noix 20 aen, yez couh beij gyaz lai 20 aen; gyaz beij yez noix 40 aen, yez couh beij gyaz lai 40 aen. 20% couhdwg 20%, gaenbonj bienq mbouj baenz 25%.”

Mbiengjlamz daibyauj Gauh Cibungz vah ngamq gangj sat, mbiengjnding daibyauj Cauz Yijgoj sikhaek buek naeuz: “Mbiengj dou genhciz nyinhnaeuz yez beij gyaz lai 25%. Lumj, sam nienzgaep miz 100 boux hagseng, hagseng seiq nienzgaep beij sam nienzgaep noix 20%, couh- dwg 20 boux, ndigah seiq nienzgaep miz 80 boux. Seizneix, dou dwg aeu vunzsoq sam nienzgaep guh danhvei ‘1’. Vunzsoq sam nienzgaep beij seiq nienzgaep lai bak faenh cih geij ne? Biucinj gaij guh seiq nienzgaep lo, seizneix vunzsoq seiq nienzgaep couhdwg danhvei ‘1’. Seiq nienzgaep cij miz 80 boux, 20 boux dwg 80 boux bak faenh cih geij ne? Liedsik dwg 20÷80×100%=25%, ndigah hagseng sam nienzgaep beij hagseng seiq nienzgaep lai 25%.” Bouxyawj bueklwnh bekfwngz goksasa. Bouxcujciz Cuh lauxsae hix vih mbiengjnding gangj haenx ngaek gyaeuj haenhndei.

Mbiengjlamz mbat neix caencingq saw lo. Mbiengjlamz daibyauj Gauh Cibungz naeuz: “Dou gaenq rox lo, gangj bak faenh beij seiz, wnggai sien dinghcinj aeu byawz guh danhvei ‘1’, hix couhdwg dinghcinj aeu byawz guh biucinj doxbeij. (roek nienzgaep Cwng Gyahdung)