Ngoenz he, “30 ik” caeuq “290000 fanh” song boux baengz- youx ndei neix doxcaez bae youz.

Songde ginggvaq aen giuz- faexdog he, doiqnaj sawqmwh okyienh ndaek doxdaiq hung he—— “2800000000”.

Cij dingqnyi ndaek neix hengz- manz dwk naeuz:“Doiqnaj song lwg iqet neix, vaiqvaiq doiq dauqlaeng, hawj gou daihvuengz gvaq giuz gonq!”

“30 ik” gig ndatheiq: “Mwngz naeuz byawz dwg boux iqet, byaengq lwgda mwngz yawj cingcuj, gou mbouj dwg 30, dwg 30 ik.”

Ndaek doiqnaj yawjsiuj naeuz: “30 ik youh baenzlawz ne, mbouj yawjraen gou dwg boux cib vih soq ha!”

“30 ik” haha daihsing riu naeuz:“Mwngz daiq yawjsang swh- geij lo, aensoq mwngz gaij sij baenz yungh ik guh danhvei, hix couhdwg 28 ik, beij gou lij noix 2 ik bw!”

Ndaek hengzmanz neix baez dingq, miz di doeknaiq lo: “Ndei ba, hawj mwngz gvaq gonq. Mboujgvaq, boux iqet baihlaeng mwngz itdingh aeu doiq dauqbae.”

“30 ik” nyeux gyaeuj doiq “290000 fanh” naeuz:“Mwngz vaiq di dawz bonjsaeh caen mwngz okdaeuj, mboujne couh deng vunz hangz lo!”

“290000 fanh” riuhwhw naeuz:“Mboujne gou caj yaep he caiq gvaqbae, gou couh mbouj caeuq de ceng lo.”

“30 ik” ngauzngauz gyaeuj naeuz:“Doiq cungj vunz mbouj rox dauhleix neix, itdingh hawj de gwn di haemz cij ndaej.”

“Baenz, couh dingq mwngz gangj.” “290000 fanh” gangj sat, couh fwt bienq mbat he, cij raen aen “fanh” gwnz ndang de sikhaek bienq baenz seiq aen 0, loh’ok aensoq caensaed de——2900000000.

Mbat neix, “2800000000” ngawz lo, de gvaigvai ndwn daengz henzbien bae, hawj song boux daeggo gvaq giuz gonq. “30 ik” byaij daengz henz ndang de, dingz roengzdaeuj naeuz:“Gaej caiq dasang guengz lai lo. Yaek geiq youq, mwngz ak, lij miz vunz beij mwngz ak bw!” (Dangz Veibingh)