Daxgoeng gaenq 60 lai bi lo, de miz aen daegdiemj he couhdwg gyaez guenj siujsaeh.

Miz ngoenz singhgizhaj banringz he, daxgoeng gwih ci daeuj ciep gou ma ranz. Daengz buenqloh, de sawqmwh dingz ci roengzdaeuj. “Daxgoeng, dingz ci guh gijmaz?” “Mwngz mbouj yawjraen gyang loh miz bohliz soiq ha?” “Mwngz gaej guenj gij siujsaeh neix lo. Cijaeu mbouj camz deng daici raeuz, guenj de guh maz lo!” “Camz deng byawz cungj mbouj ndaej.” Daxgoeng gungj hwet roengz gip bohliz soiq hwnjdaeuj, vut daengz aendoengj coux nyapnyaj henz loh bae, bekbek faenx gwnz fwngz le, cij cuengqsim gwih ci doz gou bae.

Lij miz baez ndeu, youq goengloh laeng ranz gou, daxgoeng cingq youq henz loh guh hong, miz boux vunz he daici mozdozceh de dek lo. Henzgyawj mbouj miz bouq coih mozdozceh, boux vunz haenx gip ndaej baenqlulu. Daxgoeng raen le sikhaek cuengq hong ndaw fwngz roengz, bae bang boux vunz haenx ra hongdawz bouj daici, bouj haujlai nanz, aen daici bouj ndei lo. Boux vunz haenx doiq daxgoeng gangj sing “docih” he, couh gwih mozdozceh bae lo. Daxgoeng sousib ndei doxgaiq, laebdaeb guh hong. Daxbuz yawjraen le, cam: “Boux vunz haenx dwg byawz ha?” Daxgoeng naeuz:“Byawz rox de dwg byawz.”

Daxgoeng guenj gvaq siujsaeh daiq lai lo, itseiz gou cungj gangj mbouj ndaej liux.

(sam nienzgaep Vangz Yinghyangz)