Daxmeh nyaenma seng ndaej duz nyaenma dog ndeu, cungh dangqmaz.

Ngoenz neix, daxmeh nyaenma yaek son nyaenma lwg ra gwn lo. Seiz gwn caeuz, daxmeh heuh nyaenma lwg gwn imq di, gangjnaeuz gwn imq le cij miz rengz, de yaek daiq nyaenma lwg bae gaeb duzroeg. Nyaenma lwg angq dangqmaz.

Songde soemh laep daeuj- daengz diegyouq vumzvauz. Daxmeh baez duz baez duz son nyaenma lwg baenzlawz gaemz ndeu haeb dai duz vumzvauz. Nyaenma lwg couh ciuq yiengh daxmeh de, duz gaemz duz gaemz haeb dai vumzvauz. Songde laebdaeb haeb dai geijcib duz le, hoengq fwngz dauqma! Nyaenma lwg yinx cungj guhcaemz neix, de angq dangqmaz.

Ngoenz daihngeih, nyaenma lwg gag iu daxmeh okbae ra gwn.Daeujdaengz ranz vunz ndeu, nyaenma lwg baez haeuj riengh gaeq bae, couh gaemz duz gaemz duz, laebdaeb haeb dai geij duz gaeqlwg. Daxmeh de ganjgaenj laengz de naeuz: “Bouxvunz coengmingz maenh’ak, raeuz mbouj ndaej daekcoih lai. Gyoengqde ciengx gaeq mbouj yungzheih, danghnaeuz hawj bouxvunz rox raeuz luenh sai gij doxgaiq gyoengqde, raeuz couh boihseiz lo.”Doeklaeng, songde couh boux gamz duz gaeqlwg ma ranz lo.

Ngoenz neix banringz, nyaenma lwg gag daeujdaengz ranz vunz ndeu, laeglemx ndonj haeuj riengh gaeq bae. De siengj ra gaeqlwg gwn, hoeng, ndaw riengh mbouj miz saek duz gaeqlwg, cij miz duz gaeqmeh ndeu cingq youq laj ndit aen gumz sa ndeu dajrouh. Gaeqmeh mbouj haeujsim nyaenma lwg haeujdaeuj, cij goq bek fwed bapbap. Lwg nyaenma yawjyawj gaeqmeh, yaemjyaemj youq ndaw riengh baenq gien ndeu, hoeng, de cix ra mbouj raen saekduz gaeqlwg. Sawqmwh, de yawjraen cibgeij aen gyaeqgaeq comz youq gwnz byoz fiengz he, de angq raixcaix, iet fwngz bae aeu. Gyaeqgaeq ndatfwdfwd, nyaenma lwg fwt siengj daengz, daxmeh de gangj gvaq, gaeqmeh bomz gyaeq ngeihcib lai ngoenz cij faeg ndaej gaeqlwg okdaeuj. Nyaenma lwg ngeix:“Gij gyaeqgaeq neix haengj- dingh dwg duz gaeqmeh haenx. De seizneix bae yietnaiq lo, gou couh daeuj bang de bomz ba.”Ngeix dwk, nyaenma lwg couh menhmenh bomz youq gwnz byoz gyaeqgaeq bae.

Nyaenma dauqdaej hix ndaej faeg baez gaeqlwg ndeu lo! De ndawsim ngeix:“Gaeqlwg youq ndaw gyaeq raeuj le couh ndiu lo, caiq dot byak gyaeq le couh ndaej ndonj okdaeuj.” Nyaenma lwg ngeix dwk ngeix dwk, nyaenx mbouj ndaej ndawsim gag angq:“Haha, gou couh yaek dang daxmeh lo. ”

Nyaenma cingq naemj dwk gyoengq gaeqlwg byoeng roengzdaeuj le baenzlawz heuh de daxmeh, ndawsim diemzsubsub, gaeqmeh daeuj lo. Gaeqmeh iethoz baez yawj, da daengx lo, de geizheih dangqmaz: “Gyaeq ne? Nyaenma lwg unqswnh bomz youq gizneix guhmaz, bang gou faeg lwg ma? ”Gaeqmeh mbouj miz banhfap, youh bae youzbyaij dak ndit lo.

Yaep he, dahlwg bouxcawj daeuj lo. De yawjraen nyaenma lwg angq- vauvau bomz youq gwnz gyaeqgaeq, couh geizheih dwk byaij gvaqbae.

Dahsau rop nyaenma lwg hwnj- daeuj baez yawj, gyaeqgaeq aen’aen cungj ndei ne. Caiq yawj, gaeqmeh hix mbouj heiq mbouj linj, cwxcaih dangqmaz.

Dahsau riunyumnyum rop dawz nyaenma lwg, umj de byaij daengz rog dou hongh, menhmenh cuengq gwnz dieg bae，caiq menhmenh bongx laeng hwet de mbat ndeu, heuh de baema lo.

(Ganh Sozvwnz/甘说文)