Daxboh gou dwg “ciuvunz”. Mboujloek, couhdwg yienghneix! Miz vunz cam gou: “Daxboh mwngz vihmaz dwg ciuvunz ne? Mwngz yawj boux ciuvunz ndaw denyingj, hwnj mbwn ndonj deih, yienghyiengh caixhangz. Daxboh mwngz ndaej lwi?” Gou doiq ciuvunz aen dingyi neix mbouj dwg yienghneix bw, vaiqvaiq dingq gou gangj ba.

Youq ndaw ranz, daxboh couh- dwg boux saenzbaujhu gou. Gou angq seiz heuh daxboh, gou vei seiz heuh daxboh, nyapnyuk seiz heuh daxboh. Mboujlwnh gou seizlawz heuh daxboh, daxboh cungj lumj boux siuhfangzyenz nei riengjret ganj daengz henz ndang gou.

Daxboh gou dwg boux sezgiswh maenh’ak ndeu, youq dieg gou gig mizmingz ne! De hawj haujlai giyez sezgi gvaq gyaujci, lij hawj hagdangz dou caeuq gij hagdangz wnq sezgi gvaq hagdangz vwnzva gensez. Mwh guh sezgi aeu dingh sim roengzdaeuj, daxboh youq naj dennauj baez naengh couh naengh geij diemj cung. Cogauj guh ndei le, lij ginggvaq fanjfuk gaij caeuq diuzcingj. Yawj gij yiengh daxboh nyinhcaen haenx, gou daj ndawsim boiqfug de.

Daxboh lij gig rox guh hongranz. Mwngz yawj, de youq ndaw ranz nyaengq cungj dingz mbouj roengzdaeuj, yaep he uet deih, yaep he uet cueng, yaep he cingjleix aenmbonq, aeu aenranz baet ndaej seuqsatsat. Daxboh lij gig rox cawj byaek, gij byaek de cawj haenx haekfeih dangqmaz, caenh dwg yawj myaiz gou couh rih okdaeuj.

Youq ndawsim gou, daxboh couhdwg boux “ciuvunz” he, baenzlawz yiengh? Mwngz fug luba.

(seiq nienzgaep Hoz Sinhyenz)