Banhaet, gou cingq youq ndaw ranz sij cozyez, sawqmwh dingqnyi ndawhongh cienz daeuj sing duzgaeq hemq “godoek go- doek”. Gou gag siengj: Dwg mbouj dwg duz gaeqmeh yaek ok gyaeq lone? Gou naengh mbouj youq, cuengq bit roengzdaeuj, vaiq- vet buet daengz ndawhongh.

Daeujdaengz ndawhongh baez yawj, caen dwg gaeqmeh mbouj dingz byaij bae byaij dauq, ndaw bak lij mbouj dingz hemq “godoek godoek”. Yawjdaeuj de cingq ra dieg ok gyaeq. Daih’iek gvaq geij faen cungj, gaeqmeh dauqdaej siengj ok gyaeq lo. Cij raen de sien dwg ietiet aenhoz yawjyawj rongzgaeq, raen baihndaw mbouj miz maz yungyiemj, ciepdwk youh yawjyawj seiqhenz, hix mbouj miz maz cingzgvang, de cij cuengqsim byaij gyawj rongzgaeq.

Daengz ndaw rongzgaeq, gaeqmeh sien yungh din saiq fiengz ndaw rongz, hawj aenrongz cungqgyang mboep di, yienzhaeuh menhmenh maeuq roengzdaeuj. Maeuq mbouj geijlai nanz, gaeqmeh sawqmwh ndwn hwnjdaeuj, song aen da daengx ndaej luenzlulu, aennaj hoengfwdfwd, aenndang mbouj dingz iet suk. Gou gag siengj, gaeqmeh dwg cingq yungh rengz, haengjdingh yaek “seng” luba! Dahraix, cij dingqnyi “bub” sing ndeu, aen gyaeq hung he doek youq ndaw rongz. Gaeqmeh ganjgip yungh nyauj saiq daengz laj dungx de yo ndei, lumjbaenz lau vunz ciengj bae nei.

Daih’iek gvaq geij faen cung, gaeqmeh cij byaij ok rongzgaeq daeuj. Ciepdwk gaeqmeh byaij daengz ndawgyang gyoengq gaeq bae, iet aenhoz raez hemq “godoek godoek”, lumj dwg cingq naeuz: “Gou ok gyaeq lo, gou ok gyaeq lo!” Gaeqmeh yienhndaej gig vifung, gig daekeiq.

Hwhw, siengj mbouj daengz gaeqmeh okgyaeq baenzhaenx fukcab.

(seiq nienzgaep Lij Cwngzlungz)