Doenghbaez, duzlungz caeuq duz- ngwz、gaeqboux dwg baengzyoux ndei.

Ngoenz ndeu, gyoengqde doxiu bae camgya doihduz doxdax buet vaiq.

Gaeqboux maj miz doiq gaeu lengjlili ndeu, gij bwn gwnz ndang miz nding miz henj, ndongqyanyan, gyaeundei raixcaix. Duzngwz ndaw bak gamz aen caw ndongq- rikrik ndeu. Duzlungz yawj le sim haenznyaebnyaeb.

Duzlungz doiq gaeqboux naeuz: “Daegnuengx gaeqboux ha, ndang bwn mwngz geijlai gyaeundei ha, hoeng mwngz duz iq, doiq gaeu lengj mwngz sawj mwngz gyaeuj naek ndang fouz, haengjdingh nguh mwngz buet vaiq bw! Caj seiz doxdax mwngz ciq doiq gaeu mwngz hawj daeggo hwnjciengz ndaej lwi?” Gaeqboux baez dingq couh han ciq hawj de lo.

Duzlungz youh ngeux gyaeuj doiq duzngwz naeuz: “Daegnuengx duzngwz ha, mwngz ndang iq rengz noix, aencaw mwngz hung lai, mwngz gamz dwk bak cungj naiq lo, caj seiz doxdax, lau hix nguh mwngz bw, dawz daeuj hawj gou bang mwngz dawz ba.” Duzngwz dingq le gamjdoengh dwk ngaekngaek gyaeuj, haiz aencaw okdaeuj, ndenq hawj duzlungz.

Yienghneix, duzlungz gyaeuj daep doiq gaeu lengjli gaeqboux, bak gamz aencaw duzngwz, lengjlili foenghfetfet lo.

Doxdax lo, duzlungz baez bongh, sikhaek lumj mbin nei bongh bae baihnaj, hoeng, daengz cazfaex seiz, doiq gaeu gwnz gyaeuj deng ngefaex caeuq gogaeu gaz maenh lo, de doeng rag sae fwd, haemq nanz cij duet ndaej okdaeuj. Duzdouq baez ndonj ndonj gvaq geij caz faex, buet daengz byai lo.

Duzlungz doxdax saw lo, hoed naeuz: “Cungj dwg doiq gaeu caeuq aencaw neix nguh saeh!” Caemhcaiq hozndat dwk gag deuz baema daihhaij lo.

Gaeqboux caeuq duzngwz dingqnyi le, ienqhoij youh siengsim. Songde daeuj daengz haenz daihhaij, doiq duzlungz naeuz:“Daeggo duzlungz ha, gawqyienz doiq gaeu caeuq aencaw doiq mwngz mbouj miz saekdi yungh, mwngz couh boiz hawj dou ba.” Duzlungz yaepyaep da, ganvad naeuz:“Doiq gaeu caeuq aencaw yienznaeuz haih gvaq gou, hoeng gyaeundei youh dijbauj, gou yaek cang lengj cang ak swhgeij. Yaekaeu boiz hawj sou hix mbouj nanz, caj daengz seiz daengngoenz daj goengqbya baihsae swng hwnjdaeuj, ronghndwen doek roengz Dunghhaij bae ba.” Gangj dwk couh fwt ndaem roengz daej haij bae lo. Gaeqboux caeuq duzngwz cijndei naiqnueknuek dauqma ranz lo.

Hoeng, gaeqboux yaek dang gaeq- vuengz, de mbouj sijndaej doiq gaeu lengjli foenghfet de, cungj siengj duzlungz ngoenzlawz boiz doiq gaeu hawj swhgeij. Ndigah, moix ngoenz mbwn caengz rongh, gaeqboux couh hwnq mbonq lo, de muengh ha muengh, muengh daengngoenz daj goengqbya baihsae swng hwnjdaeuj, lij iet hoz raezram haenq sing haen dwk:“Lungzgo……go…… boiz gaeu ho……ho ……” Hoeng, duzlungz manzgaengq, cungj ndoj youq daej daihhaij, caiq hix mbouj okdaeuj gvaq lo.

(Ganh Sozvwnz/甘说文)