Nyeuqgim deng haem youq daej namh, ngoenzngoenz caeuq nyeuqnamh youq doxcaez, song de hwnzngoenz youq doxcaez, baenz baengzyoux gig doxndei.

Miz ngoenz he, nyeuqgim deng vunz vat bae lo, nyeuq- namh hix deng fan hwnjdaeuj lo, deng daengngoenz dak sauj, cix mbouj miz vunz leixlangh de. Nyeuqnamh saetbae baengzyoux ceiq ndei, simcingz bonjlaiz couh mbouj ndei, seizneix engq nanzgvaq lo. “Nyeuqgim henj- myagmyag, gig dijbauj; gou cix ndaemndwtndwt, soqlaiz mbouj deng vunz gyaez.” Nyeuqnamh gag gangj gag naeuz, de yied siengj yied siengsim, nyaenx mbouj ndaej daejnga’nga lo.

Gofaex hung dingqnyi nyeuq- namh daej, gvensim dwk cam: “Lanmbauq ha, mwngz guhmaz daej lo?” Nyeuqnamh couh gangj gij vutheiq swhgeij okdaeuj. Gofaex naihsim gienq naeuz: “Lanmbauq ha, gaej daej lo, byawz naeuz mwngz mbouj miz yungh? Mbouj saenq, mwngz ngiengx gyaeuj yawjyawj.”

Nyeuqnamh ngiengx gyaeuj yawj seiqhenz, seiqhenz gizgiz cungj dwg gomiuz heusausau、go- nywj heuswdswd, gwnz diegnywj lij hai miz dujva homfwdfwd. Gofaex vah naek cingz laeg naeuz: “Doenghgo gwnz dieg majhung cungj liz mbouj ndaej namh, gaej yawj namh ndaemndwtndwt, mbouj yienhda, hoeng gungyen cix gig hung bw!”

Gofaex youh naeuz:“Lan- mbauq ha, yiyi sengmingh mbouj dwg swhgeij dij geijlai cienz, dwg swhgeij cauh ok geijlai gyaciz.”

Dingq gofaex gangj le, nyeuq- namh riu lo, de enj aek naeuz: “Gou itdingh guh ndaej engq ndei, sawj swhgeij engq miz gyaciz!”

(sam nienzgaep Mung Vwnzcez)