Gvaq 20 faen cung le, lauxsae cam daihgya:“Siengj ndei sij gijmaz caengz?”

Miz boux doengzhag ndeu naeuz: “Dingjlingz miz baez ndeu, gou youq gwnz hojceh bungz daengz boux baengzyoux ndeu, song boux dou yienznaeuz gaxgonq mbouj doxrox, hoeng daihgya youq naengh ci duenh seizgan dinjdinj neix, doxgangj dox- youq ndaej gig angq. Gou cingj de gwn gagaeq, de cingj gou gwn mak. Doeklaeng gou naengh youq henz cueng deng liengz, dungx in lo, de dawz yw okdaeuj hawj gou gwn. Daengz camh le, dou nanz baen nanz biek. Aen dizcaiz neix sij ndaej lwi?”

Lauxsae naeuz:“Mwngz gangj haenx dwg saehcingz dingjlingz fat- seng, gienh saeh neix aeu mwngz caeuq boux vunz mbouj doxrox haenx lienzhaeh youq doxcaez, cijaeu miz yiyi, mizyinx, couh ndaej guh dizcaiz sij faenzcieng.”

Yenz Beibei cam lauxsae: “Dizgangh gou gaenq lied ndei lo, mbouj rox sij ndaej mbouj ndaej?”

“Mwngz sijsaeq gangjgangj.”

Yenz Beibei gig rox gangj vah: “Gou siengj sij ‘gou caeuq hagseng gou’.”

“Mwngz lij miz hagseng?” Dangz Dahaij doeksaet dwk cam.

“Hagseng gou dwg lwgvunz- baengz .”

“Miz eiqsei, mwngz gangj roengz- bae.”

Yenz Beibei ciep naeuz:“Gou mwh iq gig gyaez dang lauxsae. Hwnj siujyoz gaxgonq, gij vanzgi wnq cungj deng daxmeh sou bae lo, cijmiz roek lwg lwgvunzbaengz mbouj sij ndaej hawj daxmeh coux haeuj sieng vanzgi bae. Ngoenzhaenx, gou lumhlumh lwg neix, yawjyawj lwg haenx, cungj roxnyinh aenda hung lwgvunzbaengz lwglwg cungj gig miz gamjcingz yawj dwk gou. Gou siengjsiengj le, giet- dingh hawj gyoengq lwgvunzbaengz hwnjdangz baez he. Gou ra roek aen daengq iq daeuj, dawz lwgvunzbaengz cuengq gwnz daengq bae, bang gyoengqde naengh ndei. Gou youh ra gep hwzbanj suliu he, venj youq gwnz conghcueng. Faenjbit dwg gij faenj- veh daxmeh caiz buh yungh haenx. Diuzbien hwnjdangz dwg gaiq dawh. Cunjbei ndei le, gou naenx aenlingz gwnz danci, ‘dinglingling’, hainduj hwnjdangz lo.” (2)