“Gou imq lo, gij haeux neix gou mbouj gwn lo!” Coenz vah neix youh yiengj youq henz rwz gou. Coenz vah neix mbouj rox dahnuengx gangj geijlai baez lo, gou baezbaez cungj gangj “mbouj ndaej sai haeuxgwn”, hoeng de gaenbonj mbouj geiq ndaej. Yawjdaeuj baez neix yaek saek haeuj aenrwz de bae cij ndaej lo.

Gou huj dwk rag de daeuj henz daizhaeux.

“Mwngz guh gijmaz ha?” Dah- nuengx mbouj naihfanz dwk naeuz.

Gou ndwn youq baihnaj de, fwngzswix caphwet, fwngzgvaz vix de naeuz: “Gou caiq gangj baez he, gwn haeux yaek gwn liux bae! Lw di neix, duzmoed cungj gwn ndaej liux!” Dahnuengx hujdengdeng naeuz:“Gou gwn imq lo, caiq gwn aendungx couh dek lo!”

“Gwn mbouj liux? Gwn mbouj liux daek baenz lai guhmaz? Gaijfangginh gaxgonq gwn naengfaex、ragnywj…… naednaed haeux cungj dwg raemxhanh vuenh daeuj…… vaiq gwn haeux ndaw vanj liux bae……” Gou bibi baba doiq dahnuengx gangj.

“Mbouj gwn, mbouj gwn, gou mbouj gwn!” Dahnuengx mbwnj aenbak, ngauz aen’gyaeuj, raemxda youq gvaengzda aeng dwk.

“Ndei, mbouj gwn dwg ba, mbouj gwn gou couh mbouj hawj gwn saejdaeuz!”

“Mbouj gwn couh mbouj gwn, gou bae lwnh hawj daxmeh nyi.” De itmienh daej, itmienh buet okbae lo.

“Mwngz——” Dahnuengx gingq- yienz mbouj dingq vah gou, huj dwk gou conghndaeng cungj ok hoenz lo.

Daxmeh byaij haeuj ndaw ding, dahnuengx riengz youq baihlaeng uet dwk raemxda. “Bouxlawz heuh mwngz heifouh dahnuengx, bouxlawz heuh mwngz heifouh dahnuengx!” Daxmeh itmienh naeuz itmienh youq baihlaeng gou bek geij mbat. “Aeyo, aeyo……” Gou gyajcang in.

“Gaej daej lo, daxmeh moeb dahcej lo.” Gangj sat, daxmeh youh nyeux gyaeuj yawj gou naeuz:“Mwngz heuh dahnuengx mbouj ndaej sai haeuxgwn dwg doiq, hoeng de lij iq, cij seiq bi, dauhleix hung de mbouj rox, mwngz wnggai ra fuengfap hab de daeuj son de……”Dwg ha, gij daidu gou gienq dahnuengx dwg miz di vwndiz.

“Dwg dahceij mbouj doiq, raeuz caez bae yawj dennauj, ndei lwi?” Daidu gou cienq ndaej gig vaiq, gou byaij bae coh dahnuengx, yaeng’yaeng lumh aen’gyaeuj de. Dahnuengx raen gou yienghneix, sikhaek riu lo. Ciepdwk, gou daj gwnzvangj ra gij doz mizgven mbouj miz doxgaiq gwn dungxiek okdaeuj, gangj gij goj doxgven haenx……

Mwh gwn haeuxcaeuz, dahnuengx gwn ndaej gig seuq. Gou ndawsim gag siengj, fuengfap ndei caen miz yungh ha.

(roek nienzgaep Cinz Vwnzvaz)