Dangz cozvwnz cijdauj, lauxsae sien daezok gij iugouz baez cozvwnz neix: Daezmoeg “gou caeuq moux- moux”. Ndawde “mouxmoux” youz gak boux doengzhag gag dingh. Aeu youq gwnz gihcuj sij cingcuj saehcingz, biujyienh gij gamjcingz bouxvunz ndawde. Yienzhaeuh laux- sae cam gyoengq doengzhag: “Daihgya baenzlawz lijgaij diuz daezmoeg neix?”

Dangz Dahaij ndwn hwnjdaeuj naeuz:“Mouxmoux ndaw daezmoeg, yaek dienz aencoh roxnaeuz cwngheuh boux vunz he. Lumj gou caeuq Ciz Swhswh、gou caeuq lauxsae、gou caeuq daxboh cungj ndaej ba?”

Cinz lauxsae haengjdingh gij gangjfap Dangz Dahaij le, youh cam: “Danghnaeuz sij ‘gou caeuq daxboh’, mwngz dajsuenq baenzlawz sij?”

“Gijneix mbouj nanz, doenggvaq geij gienh saeh biujyienh gij singgwz dwzcwngh daxboh couh ndaej lo.” Dangz Dahaij naeuz.

Lauxsae mbouj bingzgyaq gij gangjfap Dangz Dahaij, cix dwg cienq ndang cam Daegcoengh:“Mwngz nyinhnaeuz de gangj ndaej doiq lwi?”

Daegcoengh siengj le siengj naeuz:“‘Gou caeuq daxboh’ mbouj dwg sij‘daxboh gou’, gawq yaek sij ‘daxboh’, hix yaek sij ‘gou’.”

Lauxsae byaujyangz le Daeg- coengh:“Doiq, ndaw cozvwnz mbouj ndaej noix ‘gou’.” Ciepdwk youh cam gyoengq doengzhag, “Mboujgvaq, Daegcoengh lij gangj mbouj cienz, byawz naengz caiq bouj gangj?”

Daihgya doigawj Liuz Yenz gangj, Liuz Yenz naeuz:“Lij haeujsim cihsaw “caeuq”. De biujyienh dwg gij saeh caeuq cingzgamj ‘gou’ caeuq ‘daxboh’, mbouj ndaej cijdwg mbiengj he doiq lingh mbiengj he, roxnaeuz song mbiengj mbouj miz lienzhaeh, wnggai daejyienh ‘daxboh doiq gou’ ‘gou doiq daxboh’ cungj gamjcingz song mbiengj doxlienz haenx.”

Lauxsae vih Liuz Yenz hoizdap haenx bekfwngz:“Gangj ndaej gig doiq.”

Ciepdwk lauxsae anbaiz daihgya itmienh siengj itmienh lied dizgangh: “Siengjsiengj sou caeuq gij vunz lawz gvanhaeh ceiq gaenjmaed; gij gvanhaeh gaenjmaed sou biujyienh youq gizlawz, lumj ndaw gwndaenj、ndaw hagsib daengjdaengj; youq song boux sou ndawde fatseng gvaq gij saeh lawz. Lied geij diemj okdaeuj, guh caizliu yaek sij cozvwnz haenx.

（1）