Bizbiz mboujlwnh bungz daengz gijmaz saeh cungj gyaez gangj: Saeh saeq ne.

Bizbiz daenj buh daep loek lwggaet, daxboh naeuz:“Lwg- gaet daep loek lo, dauq daep gvaq.” Bizbiz naeuz: “Saeh saeq ne.”

Bizbiz seizbienh baeb geij mbat denz cuengq youq gyaeuj congz, daxmeh naeuz:“Bongzbad luenhyau, yakyawj lai lo, dauq baeb gvaq.” Bizbiz naeuz: “Saeh saeq ne.”

Daeujdaengz hagdangz, saihaiz haiz gvaz soeng lo. Vangz Yaujfangh yawjraen le, lwnh de nyi:“Bizbiz, vaiq cug saihaiz ndei.” Bizbiz naeuz: “Saeh saeq ne.” Hwnj dangz dijyuz, Bizbiz buet seiz, din swix caij deng saihaiz haiz gvaz, deng laemx youq gwnz dieg, gyaeujhoq deng sieng lo. Lauxsae soengq de daengz yihvusiz, canghyw bang de swiq baksieng, daz yw.

Cuengqhag ma daengz ranz, daxmeh naeuz:“Saeh saeq ne, saeh saeq ne, gaej yawjsiuj saeh saeq ha!” Daxboh naeuz:“Saeh saeq guh ndei le, saeh hung cij guh ndaej ndei bw.”

(Bwz Yilanz)