Bingzciengz bohmeh、lauxsae cungj son gou aeu lauxsaed, mbouj ndaej gangj vahgyaj. Hoeng miz baez ndeu gou doiq daxbuz gangj“vahgyaj” lo.

Haenx dwg gou hwnj haj nienzgaep seiz, miz ngoenz ndeu, cuengqhag dauqma, gou dawz daeh- saw gveng youq gwnz daiz, couh lumh aen dungx iek ndaej yiengj- gogo haenx daihsing hemq:“Daxbuz, daxbuz, ngaiz cawj ndei caengz? Aendungx gou iek ndaej cungj benj liux lo!”“Aiya, gou laux ndaej moengjdoengj lo, lumz seizgan cawj ngaiz lo.”Daxbuz nanzgvaq dwk bekbek aen’gyaeuj gangj. Yienz- haeuh de ganjgip aeu ndaw buenzmak cij lw aen makdoengj haenx oet haeuj ndaw fwngz gou, caenciet dwg gangj:“Mwngz sien dawz aen mak neix bae gwn gonq.”

Makdoengj lumj aen daeng- loengz iq nei, henjrwgrwg wenj- myagmyag, mbawheu gwnz dingj- gyaeuj lumj aen mauh nei, youh lumj gwnz gyaeuj dahsau cug gij“byoem gaeuyiengz” haenx, gig dwggyaez. Gou gipmuengz mbiq naengmak ok, geij dip mak bizbwdbwd comz youq itheij, couh lumj geij beixnuengx ndei guhdoih gangj vahboih nei! Baez hai ok, dipmak youh lumj va- ngaeux ndaw raemx hai haenx. Yawj dipmak henjgywg bizbod neix, gou myaiz cungj lae okdaeuj lo, gou ganjgip dawz dip mak he cuengq haeuj bak bae, ha, caen diemz ha.

Mwh gou cingq gwnguk, yawjraen daxbuz nyaengq bae nyaengq dauq haenx, sim gou baez doengh, siengj daengz: Daxbuz bingzciengz baenzneix gyaez gou, gou baenzlawz gag gwn gij mak diemzsubsub neix ne? Gou sikhaek cang najmbwng, daihsing hemq:“Daxbuz, aen mak neix caen soemj ha!”“Mbouj dwg ba?” Daxbuz naeuz.“Mbouj saenq mwngz cimzcimz.”Daxbuz dingz gij hong ndaw fwngz, menhmenh byaij gvaqdaeuj. Gou ndawsim caeg angq, sikhaek dawz dip mak cuengq haeuj ndaw bak daxbuz bae. Daxbuz gwn mak le, de riu dwk naeuz:“Mwngz lwggvaejmaj neix, majlung lo, rox gingq daxbuz lo!” Seizneix, gou angq ndaej diuq hwnjdaeuj daihsing hemq:“Daxbuz deng yaeuh lo, daxbuz deng yaeuh lo!”

Gij ndit daengngoenz yaek doek roengz bya haenx ndonj gvaq conghcueng, ciuq haeuj ranz daeuj, ndaw ranz raeujrubrub, gou caeuq daxbuz gaenjgaenj doxgot youq itheiq, gij ndit daengngoenz dawz gij ngaeuz dou rag ndaej raezrang- rang……

(指导老师 廖金芳)