Boux hagseng he aenvih lau mazfanz lauxsae, ndigah miz vwndiz cungj dwg mbouj gamj cam lauxsae, boux lauxsae neix gig saeqsim, ginggvaq seizgan nanz caeuq doengzhag doxyouq, lauxsae doeklaeng fatyienh cungj cingzgvang neix lo, lauxsae couh cam boux hagseng neix vihmaz yienghneix. Hagseng naeuz: “Lauxsae, gig doiq mbouj hwnj. Gij dapanq mwngz lwnh gou haenx gou youh lumz lo. Gou gig siengj caiq cam mwngz, hoeng siengj daengz gou gaenq mazfanz mwngz haujlai baez, couh mbouj gamj caiq bae gauxca mwngz lo!” Lauxsae siengjsiengj le doiq de naeuz: “Mwngz bae diemj aen daengyouz he gonq.” Hagseng ciuq vah lauxsae bae guh lo. Lauxsae ciepdwk youh naeuz: “Caiq bae lai aeu geij aen daengyouz daeuj, yungh aen daengyouz daih’it bae diemj dawz geij aen daeng neix.” Hagseng hix ciuq guh lo. Seizneix lauxsae riu dwk doiq de naeuz: “Gij daengyouz wnq cungj dwg yungh aen daengyouz daih’it daeuj diemj dawz, hoeng gij rongh aen daengyouz daih’it lai myox lwi?” Hagseng han naeuz: “Mbouj myox ha!” Lauxsae youh doiq de naeuz: “Caeuq sou faenyiengj gij cihsiz gou miz haenx, gou mboujdanh mbouj noix bae, dauqfanj ndaejdaengz haujlai angqyangz caeuq muenxcuk. Ndigah, mwh mwngz miz maz mbouj rox, angqcoux mwngz daeuj cam gou.

Gij cihsiz boux vunz he dwg mizhanh, hoeng ginggvaq haujlai vunz seizgan nanz doxson doxlwnh, gij cihsiz raeuz couh demlai, ndigah, danghnaeuz bungz daengz gijmaz vwndiz mwngz mbouj rox, couh bae cam bouxwnq. Cam vunz heuh vunz son hix dwg cungj yozvwn he, seizlawz cungj ndaej bae cam vunz heuh vunz son, ndaej bae ndaw saw cam, hix ndaej bae cam doengzhag、lauxsae caeuq gyahcangj. Mbouj cam couh mbouj miz cinbu, couh mbouj ndaej hag daengz engq lai cihsiz.