Saedceij seiziq mizyinx dangqmaz, aenvih lwgnyez mbouj rox maz lau, doiq haujlai saeh gig geizheih, guh le mbouj noix saehhuk, hix guh le mbouj noix saeh ndeiriu.

Geiq ndaej seizhah mwh ndaej roek bi haenx, daxmeh heuh gou bae cawx gyu, gou bae daengz aen bouqgaihuq he, cawx bau gyu he couh buet ma ranz, lumz aeu cienz cauj lo. Youq gwnz loh, gou youh siengj: Gyu dwg gijmaz feih ne? Yienghneix gou sik hai bau gyu aen bak iq he, aeu di gyu he cuengq haeuj bak bae, “beibeibei, ndaengq lai lo”. Fwngz gou baez soeng, bau gyu doek roengz dieg bae lo, gyu deng saj okdaeuj daengx dieg cungj dwg, gou gop hwnjdaeuj, ganjgip bae henz suijsiz lumj dauzhaeux nei dauzgyu, dauz dwk dauz dwk, gyu cungj mbouj raen lo. Ma daengz ranz deng daxmeh ndaq can he. Seizneix siengj hwnjdaeuj, mwhde swhgeij caen huk ha!

Gou miz di manz, gyaez cingj vunz. Mwh caet bi bi haenx seizcin, gou caeuq gyoengqdoih youq gwnz bo vat aen gumz he guh hongx, cijaeu yaengyaeng caij hwnjbae, couh deng loemq roengzbae. Gou gag siengj itdingh miz vunz deng loemq roengzbae lo. Ngoenz daihngeih, dou daeujdaengz gwnz bo, swhgeij mbouj siujsim gag loemq roengz aen hongx bonjfaenh cang haenx bae lo. Mbouj cingj deng bouxwnq, dauqfanj haih swhgeij lo.

Saeh seiziq gig mizyinx, cungj sawj gou seizseiz siengj hwnj.

(ngeih nienzgaep Vangz Ginjyiz)