Cuengq sujgyaj le, dah nuengxbiuj Siujvaz daeuj ranz gou guhcaemz. Siujvaz gig lauxsaed, de yienznaeuz beij gou iq song bi, danhseih gig roxsoq. De mbouj luenh cawx doxgaiq, mbouj luenh yungh cienz.

Miz ngoenz ndeu, mbwn hwngqndat, gou caeuq Siujvaz bae haw cawx byaek. Ndaw hawbyaek vunz lai vunz daih, dou byaij daengz dan gai makyungz bae. Gou cam:“Daxgoeng, makyungz baenzlawz gai?” “Gaen maenz ndeu.” Dax- goeng naeuz. Gou yawjyawj Siuj- vaz, de gangj: “Mbouj bengz, cawx ba!” Gou couh genj le seiq gaen, gou hawj daxgoeng haj maenz ngaenz, hoeng daxgoeng youh bouj hawj gou haj maenz. Yienzlaiz, daxgoeng dawz haj maenz dangq maenz he lo. Gou sikhaek dawz ngaenz cuengq haeuj daeh bae, rag Siujvaz deuz lo.

Youq gwnz loh ma ranz, gou daekeiq dwk gangj gienh saeh neix hawj Siujvaz nyi, gou laihnaeuz de caeuq gou ityiengh angq. Siengj mbouj daengz de doiq gou naeuz: “Mwngz baenzlawz yienghneix guh ne? Nungzminz ndaem byaek mbouj yungzheih ha, mbouj rox guh geijlai hong cij ndaej sou. Gou dawz ngaenz bae boiz hawj daxgoeng lo.” Gangj sat, de daj ndaw fwngz gou dued ngaenz bae, couh buet bae coh hawbyaek lo. Gou ndwn youq gizhaenx, ndawsim gou miz cungj ienqhoij ndeu gangj mbouj okdaeuj.

Siujvaz dauqma lo, gwnz naj de loh’ok cungj riunyumj lauxsaed he. Moix baez gou siengj hwnj gij riunyumj de, couh siengj hwnj gienh saeh neix, de hawj gou roxdaengz baenzlawz guh vunz.

(指导老师: 罗少维)