Gou dwg gofaex maj youq ndaw ndoengfaex he, yienznaeuz gou caeuq gij faex wnq mbouj miz maz mbouj doengz, hoeng gou moix ngoenz gvaq ndaej gig cungsaed gig angqyangz.

Seizcin, ngafaex gou maj ok mbaw oiq, namh goekfaex maj ok go’nywj oiqet, henzde lij maj ok geij aen raet gig dwggyaez. “Cacaca……” fwn seizcin daeuj lo, baenz naed baenz naed fwn diuqbeiz haenx youq gwnz mbaw gou diuq hwnj diuq roengz, diuq baeg le, couh daj gwnz mbaw rod roengzbae, doek daengz ndaw rungj daxmeh daihdeih bae. Fwn dingz le, gwnz mbaw gou nem rim cawraemx ronghliklik, raq rumz he ci gvaq, cawraemx doek roengzbae lo, doek youq gwnz “liengjva” goraet, sawj goraet bienq ndaej engqgya dwggyaez lo.

Seizhah, mbawfaex gwnz ndang gou mwncupcup lo. Nditndat ndonj- gvaq geh mbaw, ciuq daengz go- nywj unqnem gwnz dieg. Gyoengq doenghduz gingciengz daengz laj raemhfaex liengzsub haenx guhcaemz gangjgoj. Gyoengqde lij youq gwnz ngafaex gou venj aen nungxnengh he, moix ngoenz cungj daeuj bi aennungxnengh guhcaemz.

Seizcou, mbawfaex gwnz ndang gou bienqbaenz saekhenj lo, gig gyaeundei. Hoeng, gvaq mbouj geij nanz, gij mbawfaex gyaeundei neix daj gwnz ndang gou baenz mbaw baenz mbaw loenq roengzbae lo. Gvaq geij aen singhgiz, ngafaex bienq ndaej ndoqndatndat lo, gwnz dieg caeuq gwnz aennungxnengh cix bu rim mbawfaex loenq henjrwgrwg. Yawj gij gingjsaek gyaeundei neix, aensim doeknaiq gou bienq ndei haujlai.

Seizdoeng daengz lo, rumz saebaek nitgyaengj haenx ci dwk gou saenzdwddwd. Dienheiq yied daeuj yied nit, ciengz siet hung gyaeundei he laeglemx daeujdaengz lo. Siet dingz le, gou hai da yawj seiqhenz: Daengx aen seiqgyaiq cungj bienqbaenz hausag ronghsik, gwnz faex gwnz dieg cungj bu rim siet lo. Ndit raeujrub ciuq coh daihdeih, gwnz diegsiet fat ok gij rongh yubyub yabyab, geij duz noucoengz manzgyaengj haenx youq gwnz diegsiet hausag haenx doxgyaep doxhaeb guhcaemz, louz roengz baenz coij baenz coij rizdin angqyangz.

Couh yienghneix, gou dohgvaq le bi youh bi.

(haj nienzgaep Maj Siujdingz)