Daxboh citien baenz yinx, mboengqneix conghhoz de youh in lo, gou caeuq daxmeh gig yousim. Citien haihcawq gig lai, gou caeuq daxmeh siengliengz bang daxboh gaiq ien.

Dou youq gwnz vangj ra le haujlai faenzcieng caeuq dozbienq gvendaengz citien mizhaih haenx, yaenq okdaeuj hawj daxboh yawj. Daxboh naeuz: “Gou mbouj dwg mbouj siengj gaiq, hoeng citien baenz cibgeij bi lo, siengj gaiq saedcaih daiq nanz lo.” Yawjdaeuj daxboh rox citien miz haih, cujyau vwndiz dwg gaiq mbouj ndaej. Baenzlawz guh ne?

Ngoenzsinghgiz, gou sijsaeq louzsim yawj daxboh, de byaij daengz yangzdaiz bae, haengjdingh youh bae citien lo. Gou laeglemx lwnh hawj daxmeh nyi, daxmeh baez nyouq bwnda, dawz aen cungqraemx guhcaemz gou daeuj, coux raemx rim le, yaemj din yaemj fwngz byaij daengz henz dou yangzdaiz bae, daj gehdou liuqcinj ci ien daxboh cit haenx, baez ngaeu gae, raq raemx he daj ndaw cungq byoq ok, sikhaek rwed ndaep gij feiz ciien lo.

Daxboh nyeux gyaeuj yawjraen dou, de gangjriu naeuz:“Daxmeh mwngz caen dwg boux nyingzcungq lauxsouj ha, gingqyienz cungq he couh nyingz deng lo! Daxmeh naeuz:“Gou raen yangzdaiz hoenzfodfod, laihnaeuz feizcoemh lo, ndigah ganjgip ndaep feiz ha!” Dou cungj nyaenx mbouj ndaej riuhaha lo. Daxboh doiq daxmeh naeuz:“Baezlaeng raen gou citien, mwngz couh yungh aen cungqraemx neix bang gou ndaep feizien bae, ceng’aeu caeux di gaiq ien bae. ”

(sam nienzgaep Cwnz Liminz)