Youq Seizhah hwngndat, gyoengq moed ciuqyiengh gaenxgyaek dwk guhhong, moix ngoenz mbwn ngamq rongh couh hwnqcongz, nyaengq dwk guhhong mbouj dingz.

Daekgaeuj ne? Ngoenzngoenz “gitgit、gitgit” ciengqgo mbouj dingz, doeng youz sae langh, gwn ndei youq ndei gvaq saedceij.

Giz dieg lawz cungj miz doxgaiq gwn, gwnz bya ndaw doengh cingq hai gak saek gak yiengh va, caen dwg aen seizhah angqyangz he ha!

Daekgaeuj doiq duzmoed gaenx- gyaek guhhong gamjdaengz gig geizheih. “Vei, vei, daegnuengx duzmoed, vihmaz baenzneix roengzrengz guhhong ne? Yietnaiq saek yaep, lumj gou yiengh- neix ciengqgo mbouj dwg gig ndei ha?”

Hoeng, duzmoed lij laebdaeb guhhong, mbouj yietnaiq saek yaep naeuz:“Youq seizhah rom gijgwn, cij ndaej youq seizdoeng nitgyaengj haenx gvaq ndaej ndei ha!” “Dou saedcaih mbouj miz seizgan ciengqgo guhcaemz lo!”

Daekgaeuj dingq duzmoed yiengh- neix gangj, couh mbouj caiq swt duzmoed lo. “Caen huk ha, guhmaz siengj gij saeh baenzneix nanz baez- laeng ne!”

Seizhah angqyangz gvaqbae lo, seizcou hix gvaqbae lo, seizdoeng daeujdaengz lo, rumzbaek cihuhu, gwnzmbwn doek siet mbinfengfeng.

Daekgaeuj byom ndaej mbouj baenz yiengh lo, gizgiz cungj dwg siet, di doxgaiq ndeu hix ra mbouj daengz.

“Gou danghnaeuz lumj duzmoed nei, youq seizhah rom gijgwn geijlai ndei ha!”

Daekgaeuj dayawj couh yaek laemx roengz lo, de saemxsax byaij youq gwnz diegsiet.

Duzmoed itcig gaenx guhhong haenx, seizdoeng daeujdaengz le hix mbouj lau. Gyoengqde rom miz haujlai doxgaiq, lij caep aen ranz raeujrub he.

Dang daekgaeuj ra raen ranz duzmoed seiz, gyoengq moed cingq angqyangz gwn doxgaiq ne!

“Daegnuengx duzmoed, hawj gou gwn di doxgaiq ndaej lwi? Gou iek yaek dai lo!”

Gyoengq moed doeksaet yat. “Yi! Mwngz mbouj dwg daeggo daekgaeuj youq seizhah raen gvaq haenx ha? Mwh seizhah mwngz ngoenzngoenz ciengqgo, dou laihnaeuz mwngz daengz seizdoeng le lij diuqfoux bw! Daeuj gwn di doxgaiq ba, caj ndangdaej cangq le, caiq ciengqgo ndei dingq hawj dou dingq!”

Goj iq dauhleix hung: Guh saeh- cingz raeuz yaek siengj gyae di, mbouj ndaej cij yawjraen dangqnaj.