Youq haemq nanz gaxgonq, youq ndaw singzlaux Bangzbei Yidali, miz dah lwgnyez he heuh Lidiyaj youq gizde youq. Dah de maj ndaej gig dwggyaez, hoeng, boihseiz haenx dwg, de daj iq song aen da couh fangz lo, mbouj miz banhfap yawj ndaej raen aen seiqgyaiq gyaeundei neix. Mbouj- gvaq, de soqlaiz mbouj aenvih swhgeij dafangz ienq mbwn ienq vunz, dauq dwg bae daengz gizlawz couh dawz angqyangz daiq daengz gizde. De cungj dwg naeuz:“Bohmbwn dwg goengbingz hane, de hawj gou seng- mingh, haengjdingh hix hawj gou angqyangz caeuq bouxwnq doengz- yiengh lai.”

Lidiyaj mbouj gauq bouxwnq bang de, cix lumj bouxwnq ityiengh gag ra gwn, gag ciengx bonjfaenh, de baengh gai va daeuj ciengx swhgeij, de cungj gag roxnyinh ndaw ciuhvunz swhgeij haengjdingh fatseng gijmaz saeh gig daegbied, ndigah de doiq daengzcog gig siengjmuengh.

Aensingz Lidiyaj youq haenx dep goengqbya Veizsuhveij Hojsanh. Veiz- suhveij Hojsanh hawj namh dangdieg bienq biz, hawj vunz dangdieg ndaem gij doenghgo ndaej daengz demsou.

Hoeng gyoengqvunz ndaw singz Bangzbei cix mbouj siengj daengz, Byaveizsuhveij Hojsanj cawzle hawj vunz doxgaiq gig lai, lij hawj vunz daiq daeuj cainanh.

Miz bi ndeu, Byaveizsuhveij Hoj- sanh sawqmwh byoq feiz lo. Yaepyet, daengx aensingz cungj laepraurau. Gyoengqvunz sim vueng fwngz luenh, saemxsaemx saxsax, gaenbonj deuz mbouj okbae, lumj doek roengz ndaw lajyaem bae nei. “Daihgya gaej vueng, cungj riengz gou byaij!” Youq ndaw laeprau sawqmwh cienz daeuj sing dahsau Lidiyaj dafangz haenx.

Laxlawz, Lidiyaj yienznaeuz yawj mbouj raen, hoeng, doengh bi neix daeuj, de byaij hongh gvaq gai gai va, doiq gij loh ndaw singz cungj sugsed lo. Seizde, de baengh daemj caeuq dingq couh ra ndaej loh deuz okbae, lij roxnyinh daengz gizlawz ceiq ancienz dem.

Doeklaeng Lidiyaj daiq daihgya deuz ok aensingz dwglau neix bae lo.

Aen goj neix lwnh raeuz: Miz seiz saetbae hix dwg cungj ndaejdaengz he. Dafangz doiq Lidiyaj daeuj gangj, yienznaeuz boihseiz, hoeng doeklaeng cix dwg de gouq le mingh daihgya. Ndigah, dang raeuz bungzdaengz daemjdengj caeuq hojnanz seiz, yaek giengiengz di. Aeu roxdaengz bohmbwn doiq mwngz gven hwnj aen cueng he seiz, doengzseiz hix vih mwngz hai lingh aen cueng, hawj mwngz doengzyiengh yiengjsouh gij angq- yangz ciuhvunz mwngz!