Vaiqhaemh, duzbit mbouj dingz hemqgaga. Gou baez dingq, rox gyoengqde dwg iek lo, couh bae aeu swzliuz.

Bat swzliu rim homfwdfwd he daek daeuj lo, gou gig siujsim dawz daengz henz ranzbit bae. Duzbit yawjraen gou daeuj, couh fwt humx daengz henz bakdou, mbouj dingz hemqgaga, lumj gaenq deq mbouj gib lo. Yawj gij yiengh gyoengq bit, cijaeu gou hai dou, gyoengqde couh coemj hwnj gwnz ndang gou daeuj, gou aiq dangj mbouj youq bw! Hoeng bit ha bit, sou mbouj nyiengh gou, gou baenzlawz haeujbae gueng sou ne? Miz lo, gou sawqmwh siengj ok aen banhfap he, gou gaem aeu gaem swzliu he, yaengx youq baihnaj gyoengq bit, gyoengq ngahgwn neix baez yawjraen gijgwn ndei gwn, couh angqvauvau hemq hwnjdaeuj, miz geij duz lij diuq hwnjdaeuj, ndawde miz duz he hixnaengz diuq daengz gwnz ndang lingh duz bit he bae, doeklaeng ndwn mbouj maenh, dakmai doek roengz- daeuj lo.

Yawj gyoengq bit gaenjlili haenx, gou daegdaengq mbouj haeuj ranzbit bae, siengj hawj gyoengq bit dingh roengzdaeuj, hoeng gyoengqde gaen- bonj mbouj rox gij eiqsei gou, lij dwg mwngz caenx gou gou caenx mwngz, cungj mbouj dingz ndaej saek yaep. Gou cijndei hai dou haeujbae lo, ciuq daxbuz daengq haenx, youq gwnz dieg vanq gien swzliu he, gyoengq bit sikhaek coemj gvaqbae ciengj gwn. Gyoengq bit gwnyabyab, aenndang bi bae bi dauq, miz geij duz gwn imq lo, couh byaijadad gvaqdaeuj yawjyawj gou, lumj naeuz docih gou nei.

Yawj gij bit dwggyaez neix, ndawsim gou hix angqfwfw ha.

(ngeih nienzgaep Fungz Yivwnz)