Aenban gou, buenx gou dohgvaq le seiq bi saedqceij angqyangz. Aenban gou lumj go faex hung ndeu, 60 boux hagseng dwg 60 mbaw mbawfaex, lauxsae couhdwg cawjganj gofaex, dou moix ngoenz cungj supaeu cihsiz caeuq ligliengh lauxsae hawj haenx, angqyangz majhung.

Gou gig gyaez aenban gou, aenvih de hawj le gou cingzngeih ceiq dijbauj haenx. Miz baez ndeu, youq gwnz yindung’vei doxdax, gou buet ndaej haemq menh, dwg boux ceiq doeklaeng. Mwhde, henz rwz gou cienz daeuj baenz raq baenz raq sing gyayouz, gou nyeux gyaeuj yawj, laxlawz dwg gyoengq doengzhag hemq gyayouz gujli gou, gij sing neix lumj miz fapswd nei, sawj gou daengx ndang rengzrwd, lumj yaek mbin hwnjdaeuj nei, gou buekmingh buet daengz le gizdaemx. Yienznaeuz gou mbouj dwg boux ceiq ak, hoeng gou yungh gij roengzrengz genhciz gou hoenx hingz le swhgeij, hix soundaej le gij cingzngeih beij gijmaz cungj dijbauj haenx.

Gou gyaez aenban gou, de mboujdan sawj gou soundaej le cingzngeih, lij hawj gou haujlai haujlai raeujrub. Miz baez ndeu, fwngz gou mbouj siujsim deng bohliz gvej sieng lo, gyoengq doengzhag itmienh nai gou, itmienh buet bae ra lauxsae. Lauxsae hix mbouj goq swhgeij caengz hwnjdangz sat, gaem fwngz gou couh buet bae coh yihvusiz. Daengz yihvusiz, canghyw sijsaeq bang gou bau baksieng, gou yawjraen lauxsae daengx naj cungj dwg hanh, baegfofo, gou sawqmwh roxnyinh daengz daengx ndang raeujrubrub.

Aenban gou dwg aen ban doxgiet doxbang he, gyoengqdou doxcaez hagsib, doxcaez roengzrengz, vih ndaw ban cengheiq ceng aeunaj. Gou vih gou ndaej youq aen ban neix gamjdaengz miznaj, gou gyaez aenban gou!

(seiq nienzgaep Vangz Cauh)