Muengh ha muengh, bet nyied cibhaj gou muengh haujlai nanz haenx daeujdaengz lo. Gou gyaez bet nyied cibhaj, gyaez yawj aen ronghndwen luenzlu ronghsag haenx, gyaez gwn bingjronghndwen diemzsub homfwd haenx.

Ngoenz bet nyied cibhaj, gou caeuq daegnuengx caeuxcaeux couh hwnqdaeuj lo. Baez hwnqdaeuj, daeg- nuengx couh nauh yawj ronghndwen. Daxmeh riu naeuz:“Lwg huk ha, ronghndwen dwg banhaemh cij okdaeuj, seizneix dwg banhaet ha!”Daegnuengx dingq le, mbouj ndei eiqseiq ngaem gyaeuj roengzdaeuj lo. Daengx ranz vunz cix deng gij vah daegnuengx daeuq ndaej riuhaha.

Banhaemh, dou youq gyanghongh baij bingjronghndwen caeuq dangz mak. Gou caeuq daegnuengx youq gyanghongh itmienh gwn bingj itmienh caj ronghndwen okdaeuj, hoeng caj haujlai nanz lo hix mbouj raen ronghndwen okdaeuj. Dou couh ngaeq daxbuz gangj gojgaeq ronghndwen. Daxbuz gangj aen youh aen gojgaeq ronghndwen hawj dou dingq……

Sawqmwh, daxbuz vix gwnzmbwn naeuz:“Ronghndwen okdaeuj lo!” Dou yawj hwnj gwnzmbwn bae, caen dah- raix, ronghndwen okdaeuj lo. Mwhde, ronghndwen lumj boux bawxmoq launyaenq nei, sien loh’ok di van- gungj hau ndeu, ciepdwk loh’ok buenqluenz, doeklaeng daengx aen ronghndwen daj geh fwj diuq okdaeuj lo. Dou angq raixcaix, ngiengx gyaeuj yawj ronghndwen. Sawqmwh, henz ronghndwen mbin daeuj duj fwjhau he, dangj youq aennaj ronghndwen, rongh ronghndwen daj bien fwjhau ndonj okdaeuj, youq seiqhenz dujfwj sieng baenz gvaengz ronghhau he. Gvaengz ronghhau dak dwk dujfwj daj baihlaj ronghndwen mbin gvaq. Gyaeundei lai lo! Dou yawj rongh- ndwen daengz gig gvaiz cij ninz.

Ronghndwen bet nyied cibhaj luenzlulu、ronghsagsag, dwggyaez gyaeundei raixcaix. Gou gyaez ronghndwen bet nyied cibhaj!

(seiq nienzgaep Lij Siujdanh)