Siz Cuzyingh bineix ndaej 24 bi, dwg dah sau Myauzcuz Yungzsuij Myauzcuz Swciyen Gungjdung Yangh, de daj lij iq couh haengj ciengqgo diuqfoux. 2015 nienz de daj Gvangjsih Hozciz Yozyen byaujyenj conhyez bizyez le, gag iugouz ma ndaw mbanj, daengz ndaw yangh cungsim hagdangz dang boux dwzgangj lauxsae he.

Gungjdung Yangh dwg youq ndaw bya lueg, dwg Gvangjsih aen yangh ceiq gyae ceiq gungz he. Gyoengq hagseng cungj dwg youq ndaw hagdangz youq, dingzlai hagseng bohmeh cungj dwg ok rog bae dajgoeng, gyoengqde cungj dwg gag youq ranz. Dah lauxsae neix dwg aen hangdangz neix daih’it boux dayoz bwnjgoh bizyez, de hwnjban mbouj geijlai nanz couh raen gyoengq hagseng lumj de doenghbaez lij iq nei haengj ciengqgo diuqfoux. Moix ngoenz cungj muengh hwnj dangzciengqgo, roengzdangz le lij nanznanz mbouj haengj biekhai. Doengzseiz, gyoengq hagseng cuengqhag le mbouj miz gijmaz hong guh hix mbouj miz gijmaz angq. Dangnienz 11 nyied, youq hagdangz cihciz lajde, de banh aen hozcangdonz he, aen hoz- cangdonz neix dwg daj aen hagdangz neix cauxbaenz daengz seizneix aen daih’it, mbouj geijlai nanz de caiq banh aen vujdaujdui he. Song aen duivuj neix, gyoengq hagseng dingzlai cungj dwg 8 daengz 13 bi. Daj seizhaenx hwnj, cuengqhag le de couh doxlwnz dwk son gyoengq hagseng hag ciengqgo, hag diuqfoux.

De baenzneix roengzrengz, seizneix aen hozcangdonz neix gaenq ndaej rox ciengq《Godanq Guekcoj》《Cungguek Lwgnyez Senhfunghdui Duigoh》caeuq《Boq Hwnj Aenvenz Ciengq Hwnj Go》 daengj go, vujdaujdui gaenq ndaej youq dangqnaj vunzlai yienj 《Go Myauz》《Gyanghaet Bya- myauz》daengj vujdauj miz minzcuz daegsaek haenx.

(Lungz Dauh /龙 涛）