Ndaw sujgyaj, Siujhuj caeuq dahcej caez ma ranzmbanj yawj daxgoeng daxbuz.

Gyoengqde daengz ndaw cin roengz ci le, Siujhuj raen henz loh miz gyoengq vunz he humx youq giz ndeu. De caenx haeuj ndaw geh vunz bae, yawjraen boux cawjdan he gaemdawz aen daeh he hemq:“Hoemq da mo giuz, mo baez ndeu 2 maenz. Ndaw daeh miz giuznding、giuzlamz gungh 20 aen, mo ok 10 aen giuz, danghnaeuz giuzlamz caeuq giuznding gak 5 aen, ndaej ciengj 200 maenz.”

Siujhuj yawjraen haujlai vunz bae mo, hoeng mbouj miz saek boux mo ndaej ciengj. De sikhaek siengj daengz gij cihsiz “goj- nwngzsing” hag gvaq haenx, couh dawz 2 maenz ngaenz okdaeuj, doiq cawjdan naeuz: “Boh’au, gou siengj mo baez ndeu.” Cawjdan sou cienz Siujhuj le, ndenq aendaeh hawj Siujhuj. Siujhuj mbouj cig- ciep mo giuz, dauq dwg aeu gij giuz cienzbouh raix okdaeuj: “Daihgya vaiq di daeuj yawjyawj baihndaw miz gijmaz!” Cawjdan siengj lanz Siujhuj, hoeng gaenq ceiz lo. Gyoengqvunz seizneix cij fatyienh, giuzlamz ndaw daeh cij miz 4 aen, gizyawz cungj dwg giuznding.

Siujhuj naeuz: “Daihgya yawj, gijneix couhdwg gij yienzaen sou vihmaz mo le geijcib baez, cungj mbouj mo ndaej deng saek baez lo, baihndaw cij miz 4 aen giuzlamz, baenzlawz mo ndaej ok 5 aen giuzlamz daeuj ne?”

Gyoengqvunz bouxboux cungj naeuz cawjdan, cawjdan najmong raixcaix. De dawz gij cienz sou ndaej haenx cungj doiq hawj daihgya, gouz daihgya yienzliengh de, lij baujcingq baezlaeng mbouj caiq guh gij saeh yaeuh vunz neix.

(sam nienzgaep Goh Yinyenj)