Beix:

Gij ginhbaiz daihgouj,

Nuengx naeuz bouxlawz ndaej?

Dwg danhangh aen lawz?

Nuengx gangj hawj dou dingq.

Nuengx:

Hangh 69 goenggaen,

Gingznaek caen hwnjheiq,

Dahsau Yang Yenmeiz,

Dawz ginhbaiz haeuj fwngz.

Beix:

Daihcib aen ginhbaiz,

Nuengx cai bouxlawz ndaej?

Dwg danhangh aen lawz?

Gangj hawj beix roxndeq.

Nuengx:

Binghbanghgiuz danhdaj,

Guekgya raeuz cungj hingz,

Dahsau heuh Dingh Ningz,

Dwk hingz ndaej ginhbaiz.

Nuengx:

Beix gaenq cam baenzlai,

Wnggai daengz gou cam,

Baenz rap rox baenz ram,

Cam mwngz beix aeu hoiz.

Beix:

Cam Auyin ginhbaiz,

Nuengx wnggai roxndeq,

Cam gaiqlawz gaiqde,

Beix nauqndeq hoiz mwngz.

Nuengx:

Cib’it aen ginhbaiz,

Beix cai bouxlawz ndaej?

Dwg danhangh aen lawz?

Gangj hawj nuengx roxndeq.

Beix:

Sai binghbangh danhdaj,

Guekgya raeuz ak lai,

Maj Lungz baez hwnjdaiz,

Ginhbaiz ndaej daengz fwngz.

Nuengx:

Gij ginhbaiz cibngeih,

Beix naeuz bouxlawz ndaej?

Dwg danhangh aen lawz?

Beix gangj hawj gou dingq.

Beix:

Ngeihcib aen goengleix,

Sai doxbeij gingcouj,

Vangz Cin daengz itnduj,

De couh ndaej ginhbaiz.

Nuengx:

Gij ginhbaiz cibsam,

Cam beix bouxlawz ndaej?

Dwg danhangh aen lawz?

Beix gangj hawj gou dingq.

Beix:

Dahsau Gungh Ginhgez,

De caeuq Cungh Denhsij,

Ndaw ciengz caij danhci,

Lij ndaej aen ginhbaiz.