Boh raeuz bingh sim lingz,

Ce lwgcing ndwi ganq;

Bi cai gyaep bi nanz,

Mbouj hanh cih gag daengz.

Gyouz aeu va namzceij,

Daengz ngoenzneix boiz cingz;

Boh raeuz bingh sim lingz,

Ce lwgcing ndwi ganq.

Goq ganq boh aeu ndei,

Mbouj ngawz boh bieg ranz;

Bi cai gyaep bi nanz,

Mbouj hanh cih gag daengz.

Boh yietyuk aen mbonq,

Dwk baengzbonq sam caengz;

Lwg hop naj hop laeng,

Cib faen mbouj ndeiyouq.

Naengh miz lwg caezhangz,

Banh gyaranz gaxgonq;

Boh yietyuk aen mbonq,

Dwk baengzbonq sam caengz;

Boh duenx bae seizneix,

Fanh seiq mbouj doxraen;

Lwg hop naj hop laeng,

Cib faen mbouj ndeiyouq.

Seizneix boh raeuz dai,

Vah geijlai gyonj daengq;

Ce dieg ninz dieg naengh,

Haethaemh baenzlawz lumz?

Souj sam bi hauq fuk,

Daengq lwg cuengq caeuq ngaiz;

Seizneix boh raeuz dai,

Vah geijlai gyonj daengq.

Boh raeuz haeuj yaemgan,

Lwglan fouz dieg baengh;

Ce dieg ninz dieg naengh,

Haethaemh baenzlawz lumz?

Boh baenz sien bienqvaq,

Dai bae naj nanzlumz;

Veiz daihhanz daeuj cumz,

Lumz lwgcing ndwi ganq.

Boiz aencingz lauxboh,

Byoq gimngaenz caiz max;

Boh baenz sien bienqvaq,

Dai bae naj nanzlumz.

Lwg roxyiuj rox ngeix,

It seiq mbouj ndaej lumz;

Veiz daihhanz daeuj cumz,

Lumz lwgcing ndwi ganq.

Boh raeuz dai gvaqseiq,

Daengq beixnuengx lwglan;

Saet mingh haeuj yaemgan,

Vut gyaranz ndwi ganq.

Bae ndek lwg ndek cing,

Boh hwnj din seizneix;

Boh raeuz dai gvaqseiq,

Daengq beixnuengx lwglan.

Dai haeuj im sei loh,

Ndek gya hox mbanjranz;

Saet mingh haeuj yaemgan,

Vut gya ranz ndwi ganq.

Boh cix ndwi gyaez dai,

Vaih gwnzmbwn cauz bouh;

Cojcoeng roengzdaeuj coux,

Bae imfouj cauxranz.

Haep bak dai ce lwg,

Haet doiq fuk doiq myaiz;

Boh cix ndwi gyaez dai,

Vaih gwnzmbwn cauz bouh.

Baek daeuj roengz diemjmingz,

Meiz gim cix nanz rouh;

Cojcoeng roengzdaeuj coux,

Bae imfouj cauxranz.