Ngoenzsinghgiz, gou buenx daxbuz bae cawx byaek. Henz loh miz dan gai makbingzgoj he, gij makbingzgoj haenx youh hung youh nding, gou yawj dwk myaiz cungj rih lo. Daxbuz raen gou yawj gij makbingzgoj ndwnj myaiz myab- myab, couh naeuz: “Mwngz siengj gwn, daxbuz couh cawx hawj mwngz!”

Daxbuz cam boh’au gai mak- bingzgoj:“Makbingzgoj gaen geijlai cienz?”

“Gaen 3 maenz.” Boh’au yiedcingz dwk naeuz.

“Baenzlawz baenzneix bengz? Cienh di, 10 maenz 3 gaen gai hawj gou ndaej lo.”

Boh’au dingq le bibi fwngz, naeuz: “Mbouj ndaej, makbingzgoj gou youh hung youh van, mbouj ndaej caiq cienh lo!”

Daxbuz riunyumnyum naeuz: “Couh 10 maenz 3 gaen ba, caengh hawj gou 3 gaen!”

Boh’au mbouj cingznyienh naeuz: “Ndei ba, gai hawj mwngz.”

Gou yied dingq yied huzduz: Gaen 3 maenz, 3 gaen wnggai dwg 9 maenz, daxbuz baenzlawz yied gangjgyaq yied bengz lone? Engq geizheih dwg, boh’au gingqyienz mbouj nyienh gai! Dauqdaej dwg gou huzduz lo, roxnaeuz daxbuz caeuq boh’au huzduz lo?

Mwhhaenx, boh’au caengh ndei makbingzgoj, daxbuz yaek hawj cienz. Gou ragdawz daxbuz, sing iq caem coenz he: “Daxbuz, 3 gaen ciuq yienzgyaq dwg 9 maenz, mwngz baenzlawz gangj- gyaq daengz 10 maenz ne? Neix mbouj dwg yied gangjgyaq yied bengz ha?”

Daxbuz caeuq boh’au gai makbingzgoj fwt singj gvaqdaeuj, cungj riuhaha lo.

(sam nienzgaep Lij Mingzcwz)