Ngoenzhaenx, daxboh daxmeh caeuxcaeux couh okbae banhsaeh lo, gou sij cozyez sat le, sawqmwh siengj hwnj lauxsae ciengz gangj yaek bang bohmeh guh di saeh. Gou guh ndaej gijmaz ne?

Seizhaenx, daej laeuz cienz daeuj sing hemq:“Sou huqrwix lo——”Gou sawqmwh siengj hwnj geij ngoenz gonq daxmeh sousib ndawranz, dawz haujlai bauqceij gaeuq cuengq youq gwnz yangzdaiz. Deng lo! Neix mbouj cingq dwg baez gihvei bang daxboh daxmeh he ha? Yienghneix gou buet daengz bakcueng hemq boh’au, gvaq yaep he, boh’au sou huqrwix daengz bakdou ranz gou, gou cam boh’au: “Bauqceij gaeuq gaen geijlai cienz?” Boh’au itmienh caengh itmienh naeuz: “Gaen seiq gak haj, mwngz gizneix itgungh roek gaen.”

Gou siengj:“Boh’au dwg mbouj dwg yawj gou iq yaeuh gou ne? Gou geiq ndaej daxmeh daiq gou bae hawciengz cawx byaek cungj gangjgyaq, ngoenzneix gou hix gangjgangj yawj. Gou doiq boh’au naeuz: “Seiq gak haj daiq bengz lo, mwngz cawz lingzdaeuz bae, gaen seiq gak ndaej lwi?” “Ndaej, seiq gak couh seiq gak!” Boh’au han ndaej gig vaiq, ndenq cienz hawj gou, gipgip muengz- muengz roengz laeuz bae lo.

Banngaiz, daxboh daxmeh dauqma lo, gou angq dwk aeu gienh saeh gou baenzlawz gai bauqceij gaeuq haenx gangj hawj daxboh daxmeh nyi, caj gyoengqde haenh gou. Byawz rox, gyoengqde dingq le cungj riuhaha, loengh dwk gou mbouj rox gijmaz saeh. Daxmeh naeuz gou nyi:“Daxmeh cawx byaek dwg aenvih daxmeh dwg bouxcawx; mwngz gai bauqceij gaeuq, mwngz dwg bouxgai, bouxgai baenzlawz gangjgyaq ne? Baezlaeng mbouj- lwnh guh gijmaz saeh, cungj yaek ndeindei doengh’uk cij ndaej bw!”

Laxlawz, gangjgyaq hix yaek doenghdoengh uk ha!

(sam nienzgaep Hanz Fazmingz)