Gaenh geij bi neix daeuj, Lingzyinz Yen gyahung canjnieb gezgou diuzcingj, gohyoz gveihva, ciuq gij iugouz “it yangh it nieb” “it mbanj it yiengh” si、 yienh dangjveij cwngfuj daezok haenx, youq dieg- namh gaenq cingjceih nem yanghcin、 mbanj miz diuzgienh haenx, haenq- rengz hwngfat doxlwnz ndaem ien caeuq haeuxnaz, daezsang diegnamh liyungliz caeuq canjcuzliz, saedyienh daengx bi gyang naz cungj ndaem doenghgo, coicaenh bouxguhnaz fungsou laisou.

Lingzyinz Yen doxlwnz ndaem ien haeuxnaz dwg cungj vunqsik moq ndeu, cungfaen fatok gijndei dangdieg swhyenz diuzgienh, hab- leix diuzcingj nungzyez canjnieb gezgou, youq gaiq naz ndeu sien ndaem ien、 sou ien le caiq ndaem haeuxlaeng、 haeuxlaeng sou le couh cuengq diegnamh youq ndwi roxnaeuz ndaem bwnhfoed. Cungj vunqsik neix youq Lingzyinz Yen Cauzlij Yauzcuz Yangh、 Sahlij Yauzcuz Yangh daengj diegndaem- ien ndaejdaengz doigvangq caeuq saedhengz yungh. Doigvangq cungj vunqsik neix, mboujdanh doidoengh hwngfat diegbya ndaem ok mbawien, youq gaijgez le gij vwndiz haeuxgwn diegbya, gyalai bouxguhnaz sou- haeuj, dwg cungj vunqsik nungzyez swnghcanj youqgaenj baujcwng ien haeux sueng fungsou ndeu.

Bineix aen yienh neix daengx yienh sou ndaej ienhawq 10000 lai rap, canjciz daih’iek 1200 lai fanh maenz, ranz ndaem ien bingz- yaenz laisou 65000 lai maenz. Seizneix daengx yienh ndaem iennaz 5400 lai moux, gaenq ndaem gyajhaeux sat lo, gujsuenq sou ndaej haeuxgok 325 fanh lai goenggaen, canjciz daih’iek 400 fanh lai maenz, moix ranz bingzyaenz laisou 25000 lai maenz. Daengx bi doxlwnz ndaem ien haeuxnaz moix ranz bingzyaenz laisou gungh 9 fanh lai maenz, hawj 180 lai ranzgungzhoj 720 boux vunz vut gungz baenz- fouq.

(Yi Caiconz/郁再传)