Riengz dwk nienzgeij bienq hung, seiziq hainduj cugciemh liz gou bae gyae. Hoeng miz mbangj saeh mizyinx seiziq, seizneix dauqngeix hwnjdaeuj lij dwg yienghneix cingcuj, yienghneix mizyinx. Mbouj roxsoq hix ndei, dwggyaez hix ndei, caemhcaiq loekloeng hix ndei, yungyiemj hix ndei, doengh gijneix cungj dwg youq seiziq fatseng gvaq. Dauqngeix hwnj seiziq gyaeundei、dijbauj haenx, doenghgij saeh haenx cungj sawj gou nyaenx mbouj ndaej riu ok bak……

Mwh gou lij caengz roxsoq, gou maij loengh lozswhdauh doenghgij hongdawz neix, daxboh daxmeh lau gou deng loengh sieng, cungj mbouj hawj gou yungh gij hongdawz neix daeuj guhcaemz, yienghneix gou couh heuh gyoengqde cawx dauq hongdawz suliu ndeu hawj gou. Hainduj, daxmeh hix yousim gou mbouj siujsim bungq sieng swhgeij, doeklaeng loengh nanz le, daxboh daxmeh hix mbouj caiq louzsim. Miz baez ndeu, gou fwt siengj daengz siengj “cimzcimz” gij hongdawz neix feihdauh baenzlawz yiengh. Yienghneix, gou couh dawz lozswhdauh hamz youq ndaw bak, byawz rox mbouj siujsim, gou daj gwnz congz doek roengzdaeuj, fag lozswhdauh hamz ndaw bak haenx couh camz haeuj conghhoz bae, haih ndaej caekhaex gou deng daj le geij cim. Siengjsiengj gou mwh iq caen huk, seizneix siengj hwnjdaeuj caen mizyinx.

Youq gou mwh haj bi haenx, gou daengz ranzcoj lajmbanj bae guhcaemz, gou youq ndawsingz majhung, doiq lajmbanj yienghyiengh cungj geizheih, gou gip lwgrin vut roengz diuzrij bae, yawj diemjraemx sinz gvaq seiqlengq angq dangqmaz; gou vad diuzbien gyaep gaeq gyaep bit; gou vihliux gaeb dawz gaeqlwg, deng gaeqmeh gyaep daeuj dot. Hoeng, duzmou bizbwdbwd haenx engq sawj gou geizheih. Yienghneix, gou laeglemx byaij gyawj rienghmou, dieb gij rin baihrog aenriengh, hoeng giz dieg haenx gig gaeb, couh siengj daenq coh laeng, gou yawjraen baihlaeng miz dieg cingqfuenghingz ndaemndwt he (gizsaed dwg diengz- haex, baihgwnz giet caengz doxgaiq ndaemndwtndwt he, seizhaenx gou ngamq haj bi, mbouj rox dwg maz), couh caij roengzbae, byawz rox gou baez caij roengzbae, daengx ndang couh ciemhciemh caem roengzbae, caeklaiq gou cinglingz, song fwngz ganjgip gaemdawz benjrin, mboujnex couh mbouj miz mingh lo. Doeklaeng, haih ndaej daengx ranz vunz goenj baenz geij bat raemx bang gou swiq ndang…… Siengjsiengj seizhaenx caen yungyiemj ha, daengz seizneix siengj daengz lij lau ne.

Mwh gou ndaej roek bi, daxdaiq baema lajmbanj, gou rox lajmbanj mbouj miz makbingzgoj gwn, daxdaiq gig maij gwn makbingzgoj, yienghneix gou couh veh mbaw veh makbingzgoj ndeu, geiq hawj daxdaiq. Miz ngoenz ndeu daxdaiq dwk dienhvah daeuj, gou couh cam daxdaiq mbaw veh gou sou daengz mboujcaengz, daxdaiq naeuz gaenq “dat” daeuj “gwn” lo, dangseiz gou lij laihnaeuz dwg caen ne.

Gij saeh yinx seiziq lai ndaej gangj mbouj liux, ndaejhoengq gou caiq cienzbouh lwnh hawj daihgya nyi, hawj daihgya caez yiengjsouh gij angqyangz mizyinx seiziq gou.

(roek nienzgaep Cwng Lungz- cwngz)