Duz douqhau caeuq duz douqmong baenbied youq dingjbya caeuq goekbya gak caep aen ranz he, douqhau youq dingjbya youq, douqmong youq goekbya youq.

Seizhah daeuj lo, mbwn gig hwngq, duz douqmong ndat dwk diemheiq cungj hoj bae. Dingjbya ne, cix dwg hoengheiq singjsien, lumj seizcou yienghhaenx liengz. Duz douqhau gag siengj: Goekbya dwg baenzlawz yiengh ne? Douqhau caeuq douqmong doxiek youq dingjbya doxraen. Ngamq raen naj, douqhau couh cam douqmong: “Goekbya gig hwngq ba? Mwngz daeuj ranz gou youq ba douqmong!” Douqmong naeuz:“Ndei ha, ranz mwngz caen liengz!” Song boux de youq doxcaez, dohgvaq aen seizhah liengzsubsub ndeu.

Seizdoeng daeujdaengz lo, dingjbya nit dangqmaz. Douqhau aeu gij buh de daeuj daenj liux lo, fandenz hix longz hwnj ndang lo, hoeng lij dwg nit dwk saenzdedded. Goekbya ne, lij ciuqyiengh raeujrub. Miz ngoenz ndeu, douqhau fatndat lo, couh roengz bya bae ra canghyw yw bingh. Douqmong youq goekbya yawjraen douqhau unqnemnem, couh rox de bingh lo. Douqmong ganjgip cingj canghyw daeuj, bang douqhau yw bingh ndei lo, douq- mong doiq douqhau naeuz: “Mwngz daeuj ranz gou youq ba!” Douqhau naeuz:“Ndei ha, docih mwngz lo!” Song boux de youh youq doxcaez, dohgvaq aen seizdoeng raeujrub ndeu.

Daj seizde gvaqlaeng, aenranz dingjbya mbouj dan dwg aenranz douqhau lo, dwg aenranz douqhau caeuq douqmong; aenranz goekbya hix mbouj dan dwg aenranz douq- mong, dwg aenranz douqmong caeuq aenranz douqhau lo.

(sam nienzgaep Ciz Feihsiengz)