“Daxgoeng, cozvwnz gou yaek sij mbouj okdaeuj lo, mwngz lij miz sim loengh gij va gij nywj mwngz ha!” Gou yungh rengz ngauz aenmbaq daxgoeng, ndaw bak gili gulu nam dwk.

Daxgoeng iet aenhwet ndwn hwnjdaeuj, coih cingq aennganxgingq deng gou ngauz nyeng haenx, gvansim dwk cam naeuz:“Gijmaz cozvwnz, sawj mwngz gip baenz yienghneix?”

“Lauxsae hawj dou sij cozvwnz fanjyingj mbanjranz bienqvaq, lij aeu sij neiyungz moq, mbouj ndaej cungj dwg sij laeuz daengjbyoengbyoeng, loh gvangqlanglang, gyahden caez- cienz……” Gou gaemz heiq ndeu dawz gij vah lauxsae cungj lwnh hawj daxgoeng nyi.

“Lan huk ha, mwngz mbouj rox sij va ha? Hwhw!”

“Cungj dwg va、va、va! Gou dwg naeuz cingqging, ngoenzcog couh gyau cozvwnz lo, daxgoeng!” Gou gip dwk daemh din hwnjdaeuj.

Daxgoeng vix suenva baihnaj naeuz: “Mwngz yawj gij va’nywj neix, ceiq noix hix miz bak lai cungj ba! Gijhaenx dwg faexloih, gijneix dwg nywjloih, miz gag ung, miz cawx ma, binjcungj mbouj doengz, va hai hix mbouj ityiengh. Daengx bi seiq geiq, gij va gyaeundei cungj ciengz hai, mwngz mbouj roxnyinh gyaeundei ha?”

“Mwngz caiq yawj,” Daxgoeng youh vix seiqhenz ranznden naeuz, “Ranz lawz mbouj ndaem va ndaem nywj? Yawj gij va’nywj hoengzhoengz heuheu neix, caeuq gunghyenz ndaw singz doxbeij, lajmbanj raeuz hix mbouj ca ba?” Gou ngiengx gyaeuj baez yawj, aenda ronghlik daxgoeng lumjbaenz siengjmuengh daengzcog engq gyaeundei, doengzseiz youh loh- ok gij vuenheij gig muenxcuk nei. Gou sawqmwh rox lo, angq dwk naeuz: “Daxgoeng, gou couh dawz va guh dizcaiz ndeindei sij ba!”

Gou docih daxgoeng le, saetsaet diuqdiuq buet haeuj ndaw fuengz bae sij cozvwnz lo.

(sam nienzgaep Houz Cez)