Ngoenzsinghgiz banngaiz, daxbuz cingq cien ceiz. Daxbuz cien, gou caeuq daxmeh gwn. Daxmeh itmienh gwn itmienh caeuq daxbuz gangj vah, gou itmienh gwn itmienh dingq song boux de gangj vah.

Gou dingq daxmeh naeuz, geij ngoenz gonq de caeuq daxboh cawx gij byaek haenx cienzbouh cungj doxdoengz, cungj dwg lwgbieng、makyungz caeuq majlingzsuz. Gou baez dingq, couh naeuz:“Mwngz caeuq daxboh caen dwg doiq he ha!” Daxmeh caeuq daxbuz dingq le cungj riuhaha.

Daxmeh cam:“Lwgbieng dwg byawz ceiq gyaez gwn ha?” “Gou.” Gou naeuz. Daxmeh youh cam:“Makyungz dwg byawz ceiq gyaez gwn ha?” “Gou.” Gou youh dap naeuz. “Majlingzsuz ne?” “Hix dwg gou!” Gou miz di daekeiq sing hung naeuz. Daxmeh yawjyawj gou, riu dwk naeuz:“Yienghneix mwngz wng- gai rox vihmaz gou caeuq daxboh mwngz cawx gij byaek haenx cienzbouh doxdoengz luba!” Gou sawqmwh rox lo, couh sing hung naeuz:“Gou rox lo, aenvih mwngz caeuq daxboh cungj gyaez gou!” “Hwhw……” Dax- meh caeuq daxbuz cungj riu lo. “Hwhw……” Gou hix riengz dwk riu lo.

(it nienzgaep Lij Haulinz)