Seizhah banngaiz, vunzhung cungj ninzngaiz lo, gou caeuq gyoengq doih comz youq laj gofaex, gaeb duznon daeuj gueng duzmoed. Daihgya cingq guhcaemz ndaej gig yinxdaeuz, buenx dwk rumz liengz cifengfeng, cienz daeuj sing duzbid hemq, gyoengq doih sikhaek riengz sing hemq bae ra duzbid lo. Daihgya yaemj din yaemj fwngz daeujdaengz henz caz faex he, hoeng duzbid ngaeuz cungj mbouj raen lo. Dou maeuq roengzdaeuj, caezgya mbouj guh sing. Daihgya cingq caj dwk, baihhaenx duzbid youh hemq hwnjdaeuj lo. Dou youh yaemj din yaemj fwngz byaij gvaqbae, duzbid ganvad haenx youh mbouj oksing lo. Gyoengq doih souh mbouj ndaej deng duzbid loengh, daihgya couh faen goeng bae ra. Miz seiz seizheiq ndei, dou couh gaeb ndaej dawz duzbid.

Youq ndaw seizhah hwngqndat, bae ndaw dah gaeb bya iq gaeb gungq, dwg gienh saeh dou ceiq gyaez guh he lo. Mbanjranz mwh seiziq, gofaex mwncup, raemxdah sawndik liengzsub, hozhawq le gop gop raemx he daeuj gwn, youh diemz youh liengz. Duzbya duzgungq youq ndaw raemx youz bae youz dauq, gyoengq doih dawz aen lauzleiz, vid gavaq, roengz ndaw dah bae lauz bya iq gungq iq.

Gyoengq doih daj ndaw ranz okdaeuj seiz, cungj laeglemx dawz gyu caeuq habfeiz okdaeuj. Daihgya gip fwnz daeuj coemh feiz, aeu bya iq caeuq gungq roix hwnj gwnz dietsienq bae, daz hwnj gyu, cuengq hwnj gwnz feiz bae gangq. Heiqhom sanq okdaeuj, dou lumj duzmeuz ngah gwn nei, gwnnyabnyab hwnj- daeuj. Miz seiz, dou lij daj ndaw ranz daiq lwgmaenz daeuj, dawz lwgmaenz cuengq haeuj ndaw feiz bae saz, saz dwk naengmaenz cungj remj lo, baez mbek ok, heiqmaenz homfwdfwd. Dou gwn imq le, lumj gyoengq bit nei, bumbum diuq roengz dah bae youzraemx baeuh raemx.

Gyanghaemh seizhah rumz liengzsisi, gig cwxcaih. Gyoengq doih gwn haeuxcaeuz le cungj comz daeuj diegdangz ndaw mbanj, guhcaemz diuqcag、diuqgek、doxndoj daengj. Daihgya buet ha diuq ha, baeg le couh naengh gwnz dieg yawj ndaundeiq gwnz mbwn.

Seizhah mwh iq gig mizyinx, hawj vunz angqyangz, cungj miz baenzlai saeh hawj vunz siengj hwnj!

(Lij Cinghmingz)