Gou dwg ndik fwn iq ndeu, doek fwn lo, daxgoeng byajraez caeuq daxbuz byajmig youq gwnz fwj rongx, heuh ndikfwn dou baiz doih ndei, boux riengz boux lumj bouxbing gyang- lozsanj nei diuq roengzbae. Gou soqlaiz mbeiiq, yaek lwnz daengz gou diuq lo, baenzlawz guh ha? Gou youq gwnz fwj yaemhywx yawj coh baihlaj, ha, daiq sang lo, doengzdoih ngamq roengzbae haenx yawj mbouj raen lo, gou lau raixcaix. Daxgoeng byajraez youq henz rongxhumhum, minghlingh gou diuq roengzbae, daxbuz byajmig youq henz gujli gou naeuz:“Baihlaj di ndeu cungj mbouj lau, vanzlij gig gyaeundei dem.” Gou dingq le, aensim soeng haujlai. Doeklaeng gou siengj: Ndik fwn wnq guh ndaej daengz, gou hix guh ndaej daengz, caiqgangj, hix mbouj hawj daxgoeng byajraez caeuq daxbuz byajmig saetmuengh ha! Siengj daengz neix, gou mbeihung lo, laep da couh diuq roengzbae.

Youq gyangmbwn, gou laep ndaet song da, mbouj gamj hai da, cij dingqnyi rumz youq henz rwz bongjhuhu. Menhmenh dwk, sing rumz yied daeuj yied iq, gou menhmenh hai da, ha! Lajbiengz laxlawz baenzneix gyaeundei. Gou cingq ngonzyawj funghgingj gyaeundei seiz, gou ngiengx gyaeuj baez yawj, laxlawz ndik fwn wnq hix riengz gou laebdaeb diuq roengzdaeuj lo. Seizhaenx gou yawjraen ndikfwn beij gou roengz- daeuj gonq haenx: Miz mbangj cigsoh doek daengz gwnz dieg, nyinh cumx diegnamh; miz mbangj bae ndaw ndoengfaex, hawj gofaex gwn raemx imq le, gofaex yungh mbawfaex heuyauyau caeuq ngafaex maengh de vih dou damz hwnj yinhloz ndei dingq; miz mbangj bae daengz diegnywj, hawj go’nywj bienq ndaej engq heuoiq; miz mbangj bae ndaw suenva hoengzhoengz henjhenj, sawj dujva engq gyaeundei lo. Gou menhmenh doek daengz ndaw diuz rij iq he bae, caeuq bya iq gungq iq daxcaez guhcaemz, caen angq ha!

Mbwn ciemhciemh gvengq lo, daengzngoenz okdaeuj lo, gou youh deng daxgoeng daengngoenz daiq baema lo, gou caen siengj caiq yienghneix daeuj youz baez he ha!

(roek nienzgaep Vangz Yauj- yangz)