Youq ndawsim duzdouq, de gag nyinhnaeuz swhgeij dwg baengzyoux dog duz mwindaem.

Miz ngoenz ndeu, mwindaem lwnh duzdouq nyi: “Mwngz dwg baengzyoux ndei gou, hoeng mbouj dan dwg baengzyoux dog gou. Go faex neix hix dwg baengzyoux gou.” Mwindaem nyeng ninz youq gwnz gofaex ngafaex hung ndeu, yawj dwk gwnzmbwn lamzoo.

“Hoeng gofaex mbouj rox byaij, mbouj rox gangj vah, mbouj rox riu youh mbouj rox daej, de baenzlawz suenq dwg baengzyoux mwngz ne?”

“Byawz naeuz baengzyoux gou mbouj rox gangj vah, mbouj rox doengh ne?” Mwindaem youq gwnz faex fanndang mbat he naeuz, “Mwngz dingq——”

Seizhaenx miz raq rumz he ci gvaq.

“Mbawfaex mbouj cingq dwg ciengq go ha? Caiqgangj, ninz youq gwnz faex yawj aenmbwn lamzoo, gwnzmbwn bienq ndaej engq geizmiuq, aenmbwn hix baenz baengzyoux gou lo……”

“Yienghneix gangj, gou hix miz baengzyoux yienghneix.” Biek duzmwi bae, youq gwnz loh, duzdouq gag siengj.

Duzdouq daeujdaengz ndaw ndoengfaex gaiq dieg he, gizde miz diuz rij he lae gvaq, dieg sang maj miz go’nywj mwncupcup. Duz- douq ninz roengzdaeuj, go’nywj mboujdanh sawj de ninz ndaej cwxcaih, youh soengq daeuj gij heiq homfwdfwd dem; raemxrij cingq ciengq go hawj de dingq, gwnzmbwn dujfwj cingq vih de byaujyenj mohsuz geizmiuq……

“O, diegnywj、raemxrij caeuq gwnzmbwn cungj dwg baengzyoux gou.” Duzdouq gyaez gij baengz- youx neix. Dangyienz de hix gyaez gofaex baengzyoux mwindaem haenx.

(Cangh Ciuhswngh)