7 nyied 21 hauh, Lozcwngz Mulaujcuz Swciyen youq aen yienh neix Minzcuz Giyen banh aen cawjdaez dwg “cingcinj vut gungz·vwnzva byaij gonq” Guengsaej “sam gih” vunzcaiz haeujcoengh dajveh bouxguhhong vwnzva cienhangh hengzguh guhhong Lozcwngz fugsaeh cwngzgoj baijyienj vwnzyi vanjvei, soengq “donq haeux vwnzva”fungfouq ndeu hawj bouxyawj.

Ciuq cam rox, fungcingz gofoux Mulaujcuz 《Sing Ndeu Go Daeuj Sing Ndeu Fwen》 dwg daiz biujyienj cezmuz aen yienh neix vih dajcaux minzcuz fungcingz lijyouz cauxbien he, neiyungz baugvat 《Nuengx, Bae Youz Lo》《Bae Bo, Bae Bo》《Fwen Cuk Laeuj》 daengj biencieng, cujyau yungh ciengzgingj mbouj doengz、 cingzgingj mbouj doengz、 fuengsik mbouj doengz gyahaeuj Lozcwngz minzcuz vwnzva yenzsu Mulaujcuz yienhda haenx, baijyienj gij vwnzva caeuq fungcingz gaeuqgeq Mulaujcuz saenzheih.

(Mungz Cwnghswh/蒙增师)