Ngamqngamq gauj sat geizmued gaujsi, bonjlaiz siengj swnh youq ndaw gyajgeiz cuengqsoeng swhgeij ndeindei yietnaiq, mbouj siengj daengz lij yaek sij cozyez beij bya lij naek. Gij cozyez yaek sij haenx couh mbouj noix, hagdangz vih hawj dou gvaq aen gyajgeiz miz yiyi ndeu, youh buci haujlai sizcenj cozyez. Gou moix ngoenz lij yaek lienh gimz、youq gwnz vangjloz guh cozyez Yinghyij. Laeb- daeb song ngoenz, gou cungj mbouj rox baenzlawz guh cij ndei, gip dwk naengbak cungj hwnj bop lo.

Daxmeh yawj gou cungj yiengh- siengq neix, cam gou baenzlawz lo, gou couh gangj gij nyapnyuk gou hawj daxmeh nyi. Daxmeh mboujdanh mbouj doengzcingz gou, gingqyienz lij riuhwhw naeuz：“Gou laihnaeuz miz gijmaz saeh hung ne, couh di neix ha!”

“Baenzlai cozyez mwngz lij yiemz noix?” Gou hozndat dwk naj cungj nding lo. “Mbouj dwg mwngz sij, mwngz dangyienz yienghneix gangj lo.”

Daxmeh lumjbaenz yawj rox simsaeh gou, couh riu dwk doiq gou naeuz:“Lajmbwn mbouj dan mwngz cij miz cozyez, daxmeh hix miz ‘cozyez’ ha!”

“Gijmaz? Daxmeh lij miz ‘cozyez’?” Gou ngeizrwd dwk byaengq aenda.

Daxmeh riunyumj iet lwg fwngz he gvet aenndaeng gou, “Baenzlawz lo, mwngz mbouj saenq ha? Mwngz yawj gou moix ngoenz yaek cawx byaek、cawj haeux、saeg buh、sousib aenranz; miz seiz lij bae gyau cienzraemx cienzdienh; ndaw danhvei saehcingz lai, banhaemh lij beigo, lij gingciengz hagsib, mboujne couh lotlaeng lo; lij miz……”

Gou mbwnjmbwnj aenbak, mbouj dawz vah daxmeh haeuj sim.

“Miz seiz lij miz ‘cozyez’ gaenjgip, lumj song ndwen gonq, daiq mwngz baenz bingh liuzyih, youq yihyen youq cibgeij ngoenz, gou couh daj danhvei、yihyen、ndawranz baedauq buet.”

Dwg ha, mboengq haenx daxmeh cungj naet dwk byom lo.

“Daxboh mbouj youq ranz, ranz moq raeuz youh yaek cangndei, daxmeh lij yaek causim baenzlawz cang, youh caeuq canghcangndei bae cawx caizliu, mwngz mbouj dwg hix siengj ranz raeuz cang ndaej gyaeundei ha?”

Gou yunghrengz ngaekngaek gyaeuj.

Deng bw, daxmeh gyaez diuq- foux, lij ciengz camgya biujyienj. Geizgvaiq lo, baenz lai “cozyez”, bae gizlawz aeu baenz lai seizgan ne?

Yawj gou aennaj ngeizrwd, daxmeh naeuz:“Seizgan couh lumj raemx ndaw haijmenz, siengj nyaenj ok raemx cungj nyaenj ndaej ok. Mwngz sien guh giva, hag rox hableix anbanz seizgan, guhdaengz caemh guh caemh yiet, mboujdanh mbouj naet, lij guh noix ndaej lai. Mwngz naeuz dwg mbouj dwg ha?”

Daxmeh caen miz banhfap. Gou vihmaz mbouj hag daxmeh ne? Sij cozyez caeuq danz gimz、youq gwnz vangjloz sij cozyez Yinghyij dox giethab, okbae guhcaemz caeuq sevei sizcenj hozdung dox giethab. Deng, couh yienghneix guh! Gou itdingh ndaej gvaq aen gyajgeiz youh soengswt youh miz yiyi ndeu.

(haj nienzgaep Hanz Cingzcunz)