Miz ngoenz ndeu, gou cuengq- hag ma daengz ranz, ngamq haeuj ranz, couh dingqnyi daxmeh caeuq daxbuz gangjvah:“Ndwen neix cienz- raemx caeuq cienzdienh baenzlawz youh baenzneix lai ha?”Dwg bw, cienzraemx caeuq cienzdienh ranz gou cungj beij bouxwnq lai. Gou itcig mbouj rox neix dauqdaej dwg vih gijmaz? Yienghneix gou couh laeglemx bae cazyawj.

Doenggvaq cazyawj duenh seizgan he, gou fatyienh ranz gou miz haujlai sibgvenq mbouj ndei yungh raemx yungh dienh: Moix baez hai dienhdaeng, vunz mbouj youq lo cungj mbouj gven daeng; Ndaw ranz lij rongh, mbouj yungh hai daeng, hoeng ndaw ranz lij hai haujlai daeng; mbouj miz vunz yawj densi, hoeng densi lij ciuqyiengh hai; mwh yawj densi, yawj dwk yawj dwk couh ninzndaek lo, ndiu gvaqdaeuj, densi lij hai dwk. Yungh raemx couh engq sai raemx lo, swiq naj swiq din mbouj yungh baenzlai raemx, hoeng lij dwg coux baenz doengj baenz doengj raemx daeuj swiq; mwh swiq vanj, hai raemx suijlungzdaeuz laefafa cung swiq; raemx swiq byaek、swiq din、saeg buh, cungj baenz bat baenz bat dauj bae, caen hojsik ha.

Gou dauqdaej ra daengz yienzaen lo! Gou angq dwk lwnh hawj daxmeh nyi. Daxmeh gig doeksaet, haenh gou dwg boux lwgnyez saeqsim he. Yienghneix gou gietdingh youq ranz gou guh mbaet raemx mbaet dienh hozdung. Gou heuh vunz ndaw ranz daeuj, aeu gij giva gou lwnh hawj daihgya, gyoengqde cungj haenh gij giva gou. Vunz ndaw ranz caezsim roengzrengz, gaij gij sibgvenq mbouj ndei gaxgonq bae. Dou guh daengz vunz byaij daeng ndaep, caenh- liengh noix yawj densi. Raemx swiq byaek aeu daeuj rwed va cung diengzhaex, raemx saeg buh aeu daeuj ut deihbanj. Ndwen seizgan ndeu gvaqbae, caen miz yungh dahraix, cienzraemx cienzdienh ranz gou noix bae haujlai.

Couh yienghneix, ranz gou itcig mbaet yungh raemx yungh dienh. Gienh saeh neix gvaqlaeng, daihgya cungj heuh gou guh “guenjgya iq”. Gou gyaez aen coh neix, gou gyaez dang “guenjgya iq ndawranz”.

(seiq nienzgaep Cuih Gingboz)