Duzrwi iq gag nyinhnaeuz swhgeij gig ak haenx caeuq gyoengq rwi miz yigen lo. De gag nyinhnaeuz swhgeij guh hong gig lai, hoeng ndaej gwn dangzrwi gig noix, de ienq daihgya doiq de mbouj goengbingz, lumz gij goenglauz de, doeklaeng de hujdengdeng lizhai gyoengq rwi bae baihrog lo.

De youq gyangmbwn menhmenh cwxcaih mbin dwk, ndawsim gag siengj: Hw! Gou daengx ngoenz mbouj rox hwnzngoenz nyaengq dwk, vih gyoengq rwi mbouj rox lae le geijlai hanh, gyoengqde gingqyienz mbouj docih gou, mbouj vih gou laebgoeng, miz seiz lij heifouh gou, gou caiq hix mbouj ma caeuq gyoengqde youq lo, gou gag laeb doih rwi ndeu, swhgeij gag dang vuengz, geijlai cwxcaih ha!

Hoeng, dingjlingz miz baez ndeu, duzrwi iq yawjraen aen ciengzmienz siliengz he, sawj de gaijbienq gij siengjfap de lo.

Youq benq diegnywj heuyauyau ndeu, sawqmwh feiz coemh lo, gij feiz cingq bik gyawj rongz duzmoed, gyoengq moed siengj daj baihlaeng deuz okbae, hoeng gij feiz dawz- yubyub gaenq humx ndaet gyoengqde, gyoengq moed mbouj miz loh deuz lo. “Dai lo, gyoengq moed baenzlawz guh cij ndaej ha?” Duzrwi iq doeksaet dwk hemq hwnjdaeuj. Gig vaiq, cij raen gyoengq moed mbouj vueng mbouj linj doxcomz gvaqdaeuj, gyonj baenz aen giuz he, mingz rox yaek deng feiz coemh, gyoengqde cix mbouj lau saek di ringx gvaq geh feiz bae. Mwh “giuzmoed” ringx gvaq geh feiz, cij dingqnyi sing “bibi baba”, gyoengq moed youq baihrog “giuzmoed” haenx deng feiz coemh dai lo, daengz dieg ancienz, “giuzmoed” soeng ok, gyoengq moed youq baihndaw haenx bingz- bingz an’an, geijlai yungyiemj ha! Danghnaeuz dangseiz gyoengq moed gag goq gag deuzmingh, gyoengqde itdingh cungj deng feiz coemh dai lo. Cingq aenvih gyoengqde doxgiet youq doxcaez, cij bauj ndaej dingzlai mingh duzmoed.

Duzrwi iq yawjraen duzmoed deng feiz coemh baenzneix siliengz, sawj de siengj hwnj gij saedceij ndei doenghbaez caeuq gyoengqdoih youq doxcaez haenx, de roxdaengz gij youqgaenj rengz gyoengqdoih, rox- daengz dan baengh rengz bouxdog dwg guh mbouj baenz saeh hung, cijmiz daihgya doxcaez ok rengz, cij hoenx hingz sojmiz gunnanz.

Baezneix deuz okbae yawjraen doenghgij haenx, sawj duzrwi iq roxdaengz haujlau dauhleix, doek- laeng de youh dauqma rongz rwi caeuq gyoengqdoih lo. Baengzyoux gaxgonq diuqfoux angqcoux de. Daj seizde hwnj, duz rwi iq neix caeuq daihgya doxhuz doxndei youq itheij, gaenx guhhong, vaiqvued gvaq saedceij.

(haj nienzgaep Suh Yinjyungz)