Gou miz aen liengjva baeb ndaej ndeu, neix dwg gou hwnj it nienzgaep seiz daxmeh soengq hawj gou.

Moix baez doek fwn, gou couh gang aen liengjva ndeiyawj neix. Baengzliengj dwg baengzfuengzraemx saeklamz, gwnz de miz nyoemq valahbah he, giz mbouj gyae lij miz duz mbungqmbaj gyaeundei he, cingq dingj rumz diuqfoux, gaenqliengj dwg suliu geng guh baenz, youh mbaeu youh fuengbienh; ndokliengj dwg gangsei saekaeuj, baihrog suek miz caengz suliu ndeu, ndaej gig ndei gang aenliengj ok. Daj giz gyaez yawj, aen liengj gang ok haenx couh lumj aen raet hung he, youh lumj aen liengzdingz iq daenq ndaej he, gig mizyinx! Byaij youq ndaw fwn, naed fwn doek youq gwnz liengj yiengj bibi baba, lumj vih gou danz diuz go ndei dingq he, buenx gou byaij loh.

Mwh ndit haenq, lij dwg aen liengjva vih gou dangj ndit, hawj gou youq laj liengj gamjdaengz liengzsangj caeuq cwxcaih, hawj gou mbouj deng ndit dak.

Gou gyaez aen liengjva gou, de vih gou daiq daeuj fuengbienh, de dwg baengzyoux ndei ndaw gwndaenj gou.

(sam nienzgaep Lu Yingzlienz)