Moix bi 4 nyied 1 hauh ngoenz haenx dwg ngoenz “ciet loenghvunz”, “ciet loenghvunz” dwg daj 19 sigij hainduj youq ndaw beksingq Saefueng guekgya hwnghwnj. Ngoenz haenx gyoengqvunz aeu gak cungj fuengsik loenghriu daeuj dox- yaeuh caeuq doxloengh.

Miz bi ndeu, daengz ngoenz “ciet loenghvunz”, gou bonjlaiz siengj loengh daeggo caeuq daxmeh, hoeng, ngoenzde gvaq- bae le, gou cix mbouj loengh daengz gyoengqde.

Ngoenz haenx gyanghaet, daxmeh bang gou daenj buhvaq, gou doiq daxmeh naeuz: “Daxmeh, mwngz rox ngoenz- neix dwg gijmaz ciet lwi? Dwg ‘ciet loenghvunz’ bw!” Daxmeh naeuz:“Mwngz loengh vunz loengh ndaej sim’angq di, gaej loengh ndaej gvaqbouh bw.”

Gou caeuq daeggo caez bae hagdangz, youq gwnz loh, gou ndawsim naemj: Loenghloengh daeggo ba! Fanjcingq ngoenzneix dwg ngoenz “ciet loenghvunz”, gou hix mbouj lau de doiq gou fatheiq. Daeggo sawqmwh doiq gou naeuz:“Daehsaw mwngz miz di naek, mwngz lij iq, aemq mbouj ndaej baenzneix naek, gou bang mwngz aemq ba.” Gou angq naeuz: “Ndaej ha.” Raen daeggo doiq gou baenzneix ndei, de ciengzciengz bang gou, gvansim gou, gou sawqmwh mbouj gamj loengh daeggo lo. Naemj daengz loengh mbouj ndaej daeggo lo, daihngeih aen moegbiu——daxmeh!

Cuengqhag seiz, gou byaij ok bakdou hagdangz, yawjraen daxmeh cingq ndwn youq bakdou. “Daxmeh, ngoenzneix mwngz mbouj dwg gyaban ha? Vih gijmaz ndaej hoengq daeuj ciep gou ne?” Daxmeh naeuz:“Gyaban hix daeuj ciep mwngz ya!” Dingq daengz daxmeh baenzneix gangj, gou hix mbouj gamj loengh daxmeh lo. Daengz seizneix gou cungj mbouj gamj loengh vunz caeuq yaeuh vunz ne. （指导老师：韦江萍）