Seizhah daengz lo, ranz gou couh miz bouxhek mbouj cingj gag daeuj —— duznyungz. Duznyungz youq ranz gou, yaep ndeu youq baihnaj gou mbin gvaq, yaep ndeu youh daj laj ga gou ndonj gvaq, daegbied dwg byonghhwnz cingq ninzndaek seiz, duznyungz youh daeuj haeb, bek youh bek mbouj ndaej dawz, duznyungz youq henz rwz gongznye’nye, hawj vunz engq ninz mbouj ndaek. Gwnz ndang gou seiz mbouj seiz couh deng duznyungz haeb ndaej hwnj baenz aen baenz aen nwnj. Daxmeh yawjraen le gig sim’in, couh ndaq naeuz: “Duznyungz dwgcaengz neix! Gou yaek mied de cij ndaej.”

Vihliux siumied duznyungz, gou caeuq daxboh daxmeh couh itheij gaeb duznyungz. Gou dawz ceijnemnyungz baij youq gwnz daiz, maqmuengh miz duznyungz mbin gvaq couh deng nem dawz, couh ndaej siumied duznyungz lo. Daxboh ndaw fwngz gaem fag- gaebnyungz, daxmeh fwngz gaem bingzyw gajnyungz, yaek dawz duznyungz gaj cied bae. Bwh ndei lo, gou couh hainduj ra duznyungz, gou yawjraen gwnz cueng miz song duz nyungz, couh lumj song bouxvunz cingq caeg gangj vah ne? Gou sim siengj:“Sou vaiq di dawz vah gangj sat,mboujne couh mbouj ndaej gangj lo.Gou itdingh dawz sou siumied bae.” Gou yaengyaeng byaij daengz henz cueng, doiq cinj duznyungz couh yungh rengz bek, sim siengj:“Duznyungz ha duznyungz, baezneix mwngz deuz gizlawz bae.” Gou menhmenh hai fajfwngz daeuj yawj, ndaw fwngz gijmaz cungj mbouj miz, duznyungz mbouj rox seizlawz caeg deuz lo, ai, gaeb duznyungz caen mbouj yungzheih ha! Yawjyawj daxboh, cij raen daxboh duetdin menhmenh byaij gyawj densi, yienzlaiz gwnz densi miz duz nyungz ndeu, daxboh “ba” couh bek gvaqbae, hoeng cij bek deng fwed duznyungz. Daxmeh yawjraen le, youh hozndat youh ndeiriu, daxmeh naeuz: “Sou ndwn baih ndeu bae, yawj gou baenzlawz gaj duznyungz.” Cij raen daxmeh gaem hwnj bingz ywgajnyungz, doiq cinj duznyungz couh byoq gvaqbae. Baezneix caen miz yungh lo, duznyungz doek roengzdaeuj lo. Gou caeuq daxboh boiqfug daxmeh lai lo.

Ai, gaeb duznyungz caen mbouj yungzheih ha!