Byalingzgvi dwg youq Gveigangj Si Cinzdangz Gih Mungzgungh Yangh Mbanj Sinhgveih, aenvih goengq bya neix yiengh lumj duzgvi cix ndaej aen coh neix. Gizneix gingjsaek gyaeundei, bakgvi miz aen mboq ndeu, seizdoeng raeuj, seizhah liengz, raemx sawndikndik, daj bak byalingzgvi lae ok, ndigah youh heuh Mboqlingzgvi.

Byaij daengz bak mbanj Mbanj Sinhgveih, ngiengx gyaeuj yawj, couh raen goengq bya hung ndeu, neix couhdwg Byalingzgvi. Gou sijsaeq baez yawj, caen lumj duzgvi hung ndeu bw. Byaij gyawj goengqbya, raemxmboq seuqset sawndik daj ndaw bak “duzgvi” menhmenh lae okdaeuj. Dou daj henz de byaij gvaq, cungj nyaenx mbouj ndaej aeu raemx swiq fwngz swiq naj, siengj nem di fukheiq Mboqlingzgvi.

Seizdoeng, Mboqlingzgvi hwnj “hoenz”lo, gou laeglemx bae lumh de, ha, raemxmboq raeujrubrub, daej mboq miz bang bya iq ndeu youz bae youz dauq, geijlai dwggyaez ha! Cienz gangj doenghbaez, gwnz bya miz boux sien’gvi ndeu, seizdoeng ndaw mbanj mbouj miz raemx, miz ngoenz ndeu, vunz ndaw mbanj bae giz gyae rap raemx, gwnz loh ndik miz raemxhanh baenz ndik baenz ndik, sien’gvi yawjraen le, couh vat aen mboq ndeu hawj vunz ndaw mbanj, aenvih gizde miz rin lai, vat gig dwgrengz, de couh hwnzngoenz vat mbouj dingz, doek- laeng raemx lae okdaeuj lo, sien’gvi hix baeg lo, de cingq naengh yietnaiq, sawqmwh duzngwz ndeu daj geh rin ndonj okdaeuj, haeb aen’gyaeuj sien’gvi, sien’gvi sikhaek bienqbaenz goengq bya hung lo. Vunzmbanj vih geiqniemh sien’gvi, couh aeu aen mboq heuh Mboqlingzgvi, goengq bya hung heuh Byalingzgvi.

Daengz seizcin, gizneix gig gyaeundei, gwnz bya dauqcawq hai miz va’ndoi, ndaw doengh hai vayouzcai henjrwgrwg, rangfwtfwt. Duzrwi aeu vafaenj nyaengq dangqmaz, duzmbaj muengz diuqfoux, gyoengq lwgnyez youq ndaw va buet ha hemq ha, bouxcoz baenzsong baenzdoiq ciengj ingj siengq ne! Daxgoeng daxbuz naj riunyumj youq henz youzbyaij. Boux- boux cungj dwg angqvauvau!

Byalingzgvi gingjsaek gyaeundei, angqcoux daihgya daeuj youz.

（指导老师：韦江萍）