Ngoenzneix, mbwn gvengq ndit raeujrub. Gou iu Siujmeij、Sinhsinh daengj 6 boux baengzyoux ndei itheij youq laj gorungz hung ndaw hagdangz guhcaemz duzyiuh gaeb gaeqlwg.

Guhcaemz hainduj lo, gou dang duzyiuh, Sinhsinh dang gaeqmeh, gyoengq baengzyoux wnq couh dang gaeqlwg. Gou buet gvaq baihgvaz, youh buet gvaq baihswix. Hoeng, duz “gaeqlwg” ndeu hix gaeb mbouj ndaej dawz, duz “gaeqmeh” baujhoh ndaej daiq ndei lo. Gou ndawsim gag siengj: Baenzlai duz “gaeqlwg” cungj gaeb mbouj ndaej saek duz, gou yaek siengj banhfap cij ndaej! Ndigah, gou gyajcang ndwn dwk mbouj doengh, hawj gyoengq “gaeq” cuengqsoeng singjgaeh. Ndwn yaep ndeu le, gou fwt buet gvaq baihgvaz bae, Siujmeij raen le, lienzmuengz buet gvaq baihswix bae. Hoeng, gou youh gig vaiq buet daengz baihlaeng bae, Siujmeij deng gou gaeb dawz lo! “Ye! Gaeb dawz lo.”Gou daekeiq dwk diuq hwnjdaeuj. Siujmeij mbouj fug naeuz:“Hw, mwngz gaej daekeiq lai, baez daihngeih, mwngz itdingh gaeb mbouj ndaej dawz dou.” Gou mbouj dawz vah Siujmeij cuengq haeuj sim, naeuz: “Gaeb sou yungzheih hane.” Ciengz daihngeih youh hainduj lo. Caen dahraix, gou buet haujlai nanz hix gaeb mbouj ndaej saek duz “gaeqlwg”, Siujmeij iet linx coh gou naeuz: “Vae, daeuj gaeb gou vei, duzyiuh mbin mbouj ndaej loba?” Gou baegfofo, saedcaih buet mbouj doengh lo, gou cijndei nyinhsaw lo.

Ngoenzneix, gou mboujdanh guhcaemz ndaej gig mizyinx, lij rox guh saehcingz mbouj ndaej daiq daekeiq, guhcaemz hix roxriuj dauhleix hung, gou sim caen angq ha!

（指导老师：韦彩芳）